ТОШКЕНТ, 17 сентябрь. /“Дунё” АА/. Ўзбекистон дипломатияси фахрийси Алишер Ахунжанов Япониянинг “Чиқаётган қуёш, розета билан олтин нурлар” ордени билан тақдирланди, деб хабар бермоқда “Дунё” АА мухбири.

Япониянинг қадимий давлат мукофоти бўлган ушбу ёрлиқ ва орденни Алишер Ахунжановга элчи Кенжи Хирата тантанали равишда топширди.

Япония элчихонаси маълумотига кўра, Алишер Ахунжанов Ўзбекистоннинг Токиодаги элчихонаси очилишида фаол иштирок этган ҳамда биринчи Муваққат ишлар вакили сифатида икки давлат ўртасидаги ҳамкорликни ривожлантиришга хизмат қилган.

Шунингдек, у Ўзбекистон Ташқи ишлар вазирлиги Осиё-Тинч океани минтақаси департаменти бошлиғи лавозимида фаолият юритган даврида Япония ва Ўзбекистон ўртасидаги муносабатларни мустаҳкамлаш ҳамда дўстона алоқаларни ривожлантиришга катта ҳисса қўшган.