АНҚАРА, 23 август. /"Дунё" АА/. Ўзбекистон элчихонаси дипломатлари туркиялик инвестор Хамид Айдин билан учрашув ўтказдилар, деб хабар қилмоқда "Дунё" АА мухбири.

Мулоқот чоғида Хамид Айдин томонидан Ўзбекистонда амалга оширилаётган лойиҳаларни жадаллаштири масалалари муҳокама қилинди.

Маълум қилинишича, туркиялик ишбилармон пойтахтимиздаги "Таshkent city" мажмуасида гўзаллик ва пластик жарроҳлик йўналишида фаолият юритувчи клиникани ташкил этиш учун 1,2 миллион АҚШ доллари миқдорида инвестиция киритмоқда. Клиниканинг очилиши йил якунига режалаштирилган.

– Биз 2020 йилда Тошкентда биринчи "EKU" клиникасини очган эдик. Шундан сўнг, Самарқанд ва Урганч шаҳарларида мазкур клиника филиалларини ишга туширдик, – деди Хамид Айдин. – Бу клиникаларда 12 нафар туркиялик ва 70 нафар ўзбекистонлик шифокорлар фаолият юритмоқда. Шу кунга қадар Ўзбекистон соғлиқни сақлаш соҳасига 3,75 миллион долларлик инвестиция киритдик. Мамлакатингизда хорижлик инвесторларга, хусусан, менга кўрсатилаётган кўмак ва ғамхўрликлардан беҳад миннатдорман. Ўзбекистон Президенти томонидан ушбу соҳани ривожлантиришга алоҳида эътибор қаратилаётгани, фаолиятимизни кенгайтиришга ва янги лойиҳаларни амалга оширишга ундаяпти.

Шунингдек, учрашувда келгусида Ўзбекистонда аёллар ва болалар учун ихтисослаштирилган замонавий шифохона ташкил этиш ташаббуси ҳам кўриб чиқилди.