ТОШКЕНТ, 21 январь. /"Дунё" АА/. Ўзбекистон ташқи ишлар вазири Бахтиёр Саидов бугун Беларусь элчиси Леонид Маринични қабул қилди, деб хабар қилмоқда "Дунё" АА мухбири.

"Беларуснинг мамлакатимиздаги Элчиси Леонид Маринич жаноблари билан учрашув ўтказдик, – деб ёзди Ўзбекистон ТИВ раҳбари ўзининг telegram каналида. – Ўзбекистон-Беларусь ўртасидаги ҳамкорликнинг барча соҳаларда ривожланаётганини таъкидладик. Шу билан бирга ўзаро алоқаларни кенгайтириш йўлида ҳали катта салоҳият мавжуд. Ташқи ишлар вазирлиги жамоаси номидан жаноб элчига йиллар давомида давлатларимиз ўртасидаги икки томонлама муносабатларни мустаҳкамлашга қўшган ҳиссаси учун ўз миннатдорчилигимизни билдирамиз".

Эслатиб ўтамиз, Леонид Маринич 2018 йилда Беларуснинг Ўзбекистондаги элчиси этиб тайинланган эди. Унинг ўрнини Беларусь саноат вазирининг 54 ёшли биринчи ўринбосари Александр Огородников эгаллайди.

"Дунё" АА олган сурат