ВАРШАВА, 12 октябрь. /"Дунё" АА/. Польшанинг нуфузли "Rzeczpospolita" газетаси сайтида "Нега Ўзбекистонда бизнес қилиш ва инвестиция киритиш керак?" сарлавҳали интервью эълон қилинди, деб хабар қилмоқда "Дунё" АА мухбири.

Мақола Польша "Bank Gospodarstwa Krajowego" банкининг халқаро алоқалар департаменти бошқарувчи директори Пётр Яблоньский билан суҳбат асосида тайёрланган. Пётр Яблоньский Марказий Осиёдаги энг зич жойлашган, инвестициялар ва янги технологиялар учун очиқ бўлган Ўзбекистоннинг иқтисодий ривожланиш салоҳияти катта деб ҳисоблашини таъкидлаган. У Польша ишбилармон доиралари вакилларини шу 14 октябрь куни Краковда бўлиб ўтадиган "Doing Business in Uzbekistan" мавзусидаги конференциясида иштирок этишга чақирган.

 Нашр мухбирининг нима учун Ўзбекистон конференцияга асосий мавзу сифатида танланди, деган саволига Пётр Яблоньский қуйидагича жавоб берган: "Марказий Осиё, айниқса Ўзбекистон, стратегик мавқега эга – бу ўзига хос "Осиёга дарвоза". Албатта, бу ерда Хитой, Россия ва Туркиянинг таъсири сезиларли, лекин Европа Иттифоқи ҳам ўз мавжудлигини мустаҳкамламоқда ва минтақа билан алоқаларни ривожлантиришга интилмоқда. 2025 йил апрель ойида Самарқандда "ЕИ – Марказий Осиё" саммити бўлиб ўтган эди. Европа ва Ўзбекистон ўртасидаги бизнес имкониятлари ўсмоқда, ва биз, Европанинг бир қисми сифатида, бу жараёнда ўз ўрнимизни эгаллашимиз керак". 

 Мақола сўнгида эса, жорий йил 14 октябрь бўладиган конференцияга барча ўзбек бозорига қизиққан Кичик Польша воеводалиги тадбиркорлари учун фойдали бўлиши алоҳида қайд этилган.