МОСКВА, 8 октябрь. /"Дунё" АА/. Россиянинг нуфузли "Караван Инфо" ахборот агентлигида "Хива шаҳрида илк бор "Гиламлар жилоси" халқаро кўргазмаси бўлиб ўтади" сарлавҳали мақола эълон қилинди, деб хабар бермоқда "Дунё" АА мухбири.

Нашрда жорий йилнинг 18-19 октябрь кунлари Хива шаҳрида бўлиб ўтадиган "Гиламлар жилоси" халқаро кўргазмасига тайёргарлик кўрилаётгани ва мазкур тадбир гиламдўзларнинг ноёб маҳоратини намойиш этиш ҳамда маданий тажриба алмашиш учун ўзига хос майдон вазифасини ўташи ҳақида сўз юритилган.

Мақолада таъкидланишича, кўргазмада Ўзбекистон, Тожикистон, Қирғизистон, Қозоғистон, Туркманистон ва Эронлик ҳунарманд усталар иштирок этади. Улар авлоддан авлодга ўтиб келаётган нақшлар, ранглар ва техникаларнинг бойлигини намойиш этиб, миллий тўқимачилик мактабларининг энг ёрқин намуналарини тақдим этадилар.

"Кўргазманинг Хивада ўтказилиши тасодиф эмас. ЮНEСКОнинг Умумжаҳон мероси рўйхатига киритилган шаҳар ўз-ўзидан тарих ва анъаналар рамзи бўлиб, бу ерда гилам тўқиш қадим замонлардан бери алоҳида ўрин эгаллаб келган", – дея ёзилган материалда.

Мақола якунида қайд этилишича, "Гиламлар жилоси" кўргазмаси нафақат бадиий маҳоратни намойиш этиш, балки маданий алмашинувни мустаҳкамлаш, шунингдек, халқ бадиий ҳунармандчилиги соҳасида минтақавий ҳамкорликни рағбатлантиришга қаратилган.