МЮНХЕН, 24 июнь. /“Дунё” АА/. Мюнхен техника университети ва “Янги Ўзбекистон” университети фахрий президенти Вольфганг Антон Херрманн “Дунё” ААга берган интервьюсида Германия Федерал Президенти Франк-Вальтер Штайнмайернинг Ўзбекистонга ташрифи ҳамда V Тошкент халқаро инвестиция форуми якунлари юзасидан фикр билдирди:

– Сўнгги йилларда Тошкент халқаро инвестиция форуми жаҳон ва минтақа иқтисодиётининг долзарб масалаларини муҳокама қилиш, сармояларни жалб этиш ҳамда ўзаро манфаатли лойиҳаларни илгари суриш учун нуфузли халқаро майдон сифатида ўзини намоён этди.

Германия сиёсий ва ишбилармон доираларида Федерал Президент Франк-Вальтер Штайнмайернинг Ўзбекистонга ташрифи, шунингдек, V Тошкент халқаро инвестиция форуми (ТХИФ)нинг ўтказилиши Ўзбекистон–Германия ҳамкорлигини янада мустаҳкамлаш йўлидаги муҳим қадам сифатида баҳоланмоқда.

Мамлакатда амалга оширилаётган иқтисодий ислоҳотлар, сармоявий муҳитнинг яхшиланиши, “яшил” энергетика, саноат кооперацияси ҳамда транспорт-логистика ўзаро боғлиқлигини ривожлантиришга алоҳида эътибор қаратилмоқда.

Форум тадбирларида Германия Федерал Президентининг иштирок этиши Берлиннинг Ўзбекистон билан сиёсий мулоқотни кенгайтириш ва савдо-иқтисодий ҳамкорликни чуқурлаштиришдан манфаатдор эканини тасдиқлайди. Шунингдек, Германия ишбилармон доиралари ўзбекистонлик ҳамкорлар билан саноат, энергетика, рақамлаштириш, қишлоқ хўжалиги, кадрлар тайёрлаш ва инновацион технологияларни жорий этиш соҳаларида ҳамкорликни кенгайтиришга қизиқиш билдирмоқда.

Ишончим комилки, олий даражадаги мулоқотлар ва форум натижалари кўп қиррали Ўзбекистон–Германия шериклигини ривожлантиришга қўшимча суръат бағишлайди. Қўшма лойиҳаларни амалга ошириш эса мамлакатларимиз ўртасидаги алоқаларни янада мустаҳкамлаш учун янги имкониятларни очади.