БРЮССЕЛЬ, 28 апрель. /"Дунё" АА/. "Eureporter" нашри вакили, Марказий Осиё мамлакатлари тарихи бўйича эксперт Дерья Сойсал (Бельгия) "Дунё" АА учун интервьюсида Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедовнинг 23-24 апрель кунлари Ўзбекистонга амалга оширган ташрифи якунларини изоҳлади:

– Таъкидлаш жоизки, кўп йиллик дўстлик ва яхши қўшничилик анъаналари, шунингдек, олий даражадаги барқарор ва ишончли сиёсий мулоқот Ўзбекистон ва Туркманистон ўртасидаги стратегик шерикликни чуқурлаштириш учун ишончли асос бўлиб хизмат қилмоқда. Ушбу ҳамкорлик нафақат мустаҳкам иқтисодий алоқалар, балки минтақавий кун тартиби доирасидаги умумий манфаатлар билан ҳам қўллаб-қувватланяпти.

2025 йилда икки томонлама муносабатларда муҳим воқеа сифатида Эркин савдо тўғрисидаги битимнинг имзоланиши кўплаб товарларга божхона божларининг бекор қилинишига олиб келди ва ўзаро савдонинг ўсишини рағбатлантирди. Мамлакатлар ўртасидаги савдо-сотиқнинг кенгайиши ва ҳамкорликнинг чуқурлашиб бораётгани уларнинг Марказий Осиё минтақасида барқарорлик ва фаровонликка эришиш борасидаги умумий интилишининг ёрқин тасдиғи ҳисобланади.

Бундан ташқари, Ўзбекистон ва Туркманистон халқлари ўртасидаги маданий ва тил ўхшашликлари уларнинг бирлиги ва ўзаро ишончини мустаҳкамловчи қўшимча омил бўлиб хизмат қилмоқда. Ўзбекистон ва Туркманистон раҳбарларининг Самарқанд саммити минтақа етакчилари якдил фикрда эканини, минтақа эса нафақат ўз бирлигини сақлаб қолишга, балки глобал масалаларда фаол роль ўйнашга қодир ва тайёр эканини тасдиқламоқда.