МОСКВА, 22 декабрь. /“Дунё” АА/. Россия давлат гуманитар университети Халқаро муносабатлар кафедраси доценти Юрий Сигов “Дунё” АА мухбирига Ўзбекистон Президентининг Японияга ташрифи ва Токиода бўлиб ўтган “Марказий Осиё + Япония” мулоқотининг биринчи саммитидаги иштироки ҳақида ўз фикрларини билдирди:

– Ўзбекистон етакчисининг Японияга ташрифини диққат билан кузатиб бордим. Учрашувлар давомида икки томонлама стратегик шериклик ва кўп қиррали ҳамкорлик муносабатларини янада кенгайтириш ва мустаҳкамлаш масалаларига алоҳида тўхталиб ўтилди. Шавкат Мирзиёев аввалги хорижий ташрифлари анъанасига мувофиқ, Ўзбекистон ҳудудида савдо-иқтисодий ҳамкорликни ривожлантириш ва Япония капитали иштирокидаги инвестиция лойиҳаларини илгари суриш мақсадида йирик компания ва молия институтлари раҳбарлари билан учрашди.

Бундан ташқари, Ўзбекистон Президенти “Марказий Осиё + Япония” форматидаги давлат раҳбарларининг биринчи саммитида иштирок этди. Унда “яшил” иқтисодиёт, барқарор тараққиётни таъминлаш, минтақавий шерикликни мустаҳкамлаш ва инсон капиталини ривожлантириш каби соҳаларда ҳамкорликни кенгайтириш имкониятлари муҳокама қилинди. Ушбу ғоят муҳим саммит якунида бутун Марказий Осиё минтақаси ва Япониянинг келгуси тараққиёт векторини белгилаб берадиган Токио декларацияси қабул қилинди.

Ўйлайманки, Ўзбекистон учун Япония билан муносабатларни ривожлантириш жуда муҳим ва амалий жиҳатдан Тошкентнинг бошқа қатор йўналишлардаги (Европа, Россия, Туркия, АҚШ) кўп векторли сиёсатини тўлдиради. Япония жуда катта молиявий ресурсларга эга давлат. Япон бизнеси Марказий Осиёдаги энг фаол ва самарали бизнеслардан бири.

Япон инвесторлари Ўзбекистон раҳбарияти томонидан хорижий ҳамкорларга таклиф этилаётган қатор лойиҳаларга жуда қизиқиш билдирмоқда. Улардан бири – Тошкент аэропортини кенгайтириш ва модернизация қилишга сармоя киритиш. Шу муносабат билан, Шавкат Мирзиёевнинг ушбу ташрифдан сўнг Япония бизнеси Ўзбекистон йўналишида янада фаолроқ иш олиб бориши, давлатлараро шериклик алоқаларини кенгайтириши шубҳасиз.