ТОШКЕНТ, 14 май. /"Дунё" АА/. Самарқанд шаҳрида Ўзбекистон Олий Мажлиси ва Қирғизистон Жогорку Кенеши ўртасида ҳамкорлик бўйича парламентлараро комиссиянинг бешинчи мажлиси бўлиб ўтди, деб хабар қилмоқда "Дунё" АА мухбири.

Парламент юқори палатаси маълумотига кўра, мажлисда Ўзбекистон-Қирғизистон муносабатларининг бугунги ҳолати ва уларни ривожлантириш истиқболлари кўриб чиқилди. Ўзаро ҳамкорликнинг асосий йўналишларидан бири сифатида парламентлараро ҳамкорликни мустаҳкамлашга алоҳида эътибор қаратилди.

Савдо-иқтисодий алоқаларни кенгайтириш, инвестицияларни жалб қилиш ва икки мамлакат ўртасидаги маданий-гуманитар алмашинувни фаоллаштириш учун парламент дипломатиясидан самарали фойдаланиш механизмлари алоҳида муҳокама қилинди.

Комиссия ҳамраиси, Ўзбекистон Олий Мажлиси Сенати Раисининг биринчи ўринбосари Содиқ Сафоев сўнгги йилларда икки мамлакат раҳбарларининг саъй-ҳаракатлари туфайли ўзаро сиёсий ишончнинг мустаҳкам пойдевори яратилганини таъкидлади. Бундай шароитда Ўзбекистон ва Қирғизистон парламентлари давлатлараро муносабатларни мустаҳкамлашда муҳим ўрин тутади ва уларнинг фаолияти барча даражалардаги ҳамкорликнинг стратегик йўналишини амалга оширишга кўмаклашишга қаратилган.

Парламент дипломатияси тўғридан-тўғри мулоқот ва қонун ижодкорлиги соҳасида тажриба алмашиш учун кенг имкониятлар очиб бераётгани қайд этилди.

Мажлисда қонунчилик соҳасидаги ҳамкорлик тажрибаси, ёшлар, ижтимоий ва маданий дастурларни ривожлантириш масалалари муҳокама қилинди. Таълим, умумий тарихий-маданий меросни асраб-авайлаш, гуманитар ҳамкорликни кенгайтириш масалаларига алоҳида эътибор қаратилди.

Икки мамлакатнинг сайёҳлик салоҳиятини илгари суриш, шу жумладан, трансчегаравий йўналишларни ривожлантириш, сайёҳлар учун тартибларни соддалаштириш ва туризм инфратузилмасига сармоя киритишни қўллаб-қувватлашда парламент қўллаб-қувватлаши муҳимлиги таъкидланди.

Парламент аъзолари кўп қиррали икки томонлама ҳамкорликни чуқурлаштиришга ўзаро интилишини тасдиқлади ва парламентлараро мулоқот бундан кейин ҳам яхши қўшничилик муносабатларини мустаҳкамлаш ҳамда Ўзбекистон ва Қирғизистон халқларининг манфаатларини ҳимоя қилишда муҳим роль ўйнашига ишонч билдирди.

Мажлисдан сўнг Ўзбекистон ва Қирғизистон парламент делегацияларининг раҳбарлари Самарқанд шаҳридаги Конгресс марказининг Фахрий меҳмонлар хиёбонида биргаликда дарахт экди.