ОҚТОВ, 27 октябрь. /“Дунё” АА/. Ўзбекистоннинг Оқтов шаҳридаги дипломатлари ватандошлар ўртасида буюк мутафаккир ва давлат арбоби Алишер Навоийнинг ҳаёти ва ижодига бағишланган танлов ташкил этиб, Ўзбек тили байрамини тантанали равишда нишонлади, деб хабар бермоқда “Дунё” АА мухбири.

Байрам дастурида дипломатик корпус вакиллари, маданият марказлари ва маҳаллий жамоат бирлашмалари раҳбарлари, ватандошлар ҳамда талабалар иштирок этди.

Тадбир доирасида танлов иштирокчилари буюк мутафаккир ва давлат арбоби Алишер Навоийнинг ҳаёти ва ижодига оид ўз билимини намойиш этди.

Беллашувда фаол қатнашган иштирокчиларга эсдалик совғалари, дастлабки учта ўрин соҳибларига “Ватандош” жамоат фонди мукофотлари топширилди.

Учрашув қатнашчилари шаклланиш ва ривожланиш жараёни кўп асрларни қамраб олган, бир неча муҳим босқичларни босиб ўтган ўзбек тилининг тарихий аҳамиятини алоҳида таъкидлади.