ОЛМАОТА, 17 октябрь. /"Дунё" АА/. Қозоғистоннинг Шимкент шаҳридаги маданият ва истироҳат боғида 21 октябрь — Ўзбек тили байрами куни муносабати билан маънавий-маърифий тадбир ташкил этилди, деб хабар бермоқда "Дунё" АА мухбири.

Мамлакатимизнинг Олмаота шаҳридаги Бош консулхонаси кўмагида ташкил этилган маърифий кечада Чимкент шаҳридаги Ўзбек этномаданий маркази раҳбарлари ва фаоллари, мазкур ҳудудда таҳсил олаётган ватандошлар қатнашди.

Ўзбекистон бош консули Раушанбек Матчанов тадбирнинг очилиш қисмидаги нутқида иштирокчиларни ушбу қутлуғ сана билан табриклаб, ўзбек тилининг обрўсини халқаро майдонда янада ошириш бўйича алмалга оширилаётган ишлар ҳақида тўхталди. Икки халқнинг тарихий бирлиги, Ўзбекистон ва Қозоғистон ўртасидаги анъанавий дўстона муносабатларни алоҳида таъкидлади.

Шунингдек, миллатлараро тотувликни қўллаб-қувватлаш ва қардош халқлар ўртасидаги дўстликни мустаҳкамлашга қўшган ҳиссаси учун Ўзбек этномаданий марказига, ўзбек жамоатчилигини қўллаб-қувватлагани учун маҳаллий ҳокимият идораларига миннатдорлик билдирилди.

Байрам тадбири давомида ўзбек ва қозоқ санъат усталари иштироки концерт дастури тақдим этилди. Шунингдек, Шимкентдаги Ўзбек этномаданий маркази кўмагида миллий ҳунармандчилик маҳсулотлари кўргазмаси ташкил этилди.