СТОКГОЛМ, 26 октябрь. /«Дунё» АА/. Швециянинг «Diplomatic World Sweden» нашрида Ўзбекистон Президентининг 23-24 октябрь кунлари Брюсселга буюрган ташриф якунларига бағишланган мақола эълон қилинди, деб хабар беряпти «Дунё» АА мухбири.

Унда таъкидланишича, қарийб 30 йиллик танаффусдан сўнг Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битимнинг имзоланиши томонларнинг ўзаро муносабатларида янги бобни очди.

«Битим ўзаро савдони рағбатлантиришдан ташқари, иқлимни муҳофаза қилиш бўйича чораларни тезлаштириш, хавфсизликни мустаҳкамлаш, миграцияни бошқариш ва атроф-муҳитни муҳофаза қилиш каби муҳим соҳаларда амалий ҳамкорликни кенгайтиришга ёрдам беради», – дейилган материалда.

Нашрда ёзилишича, Ўзбекистон етакчисининг Брюсселга тарихий ташрифи мамлакатнинг халқаро обрўсини янада мустаҳкамлайди ҳамда республиканинг Европа Иттифоқининг конструктив ва ишончли ҳамкори бўлишга жиддий ёндашаётганини намойиш этади.