БУДАПЕШТ, 11 август. /"Дунё" АА/. Ўзбекистон элчиси Ойбек Шахавдинов Туркий давлатлар ташкилотининг Қурғоқчиликни олдини олиш институти директори, Венгрия экспортни қўллаб-қувватлаш агентлиги халқаро бўлими раҳбари Ласло Орлош билан учрашув ўтказди, деб хабар қилмоқда "Дунё" АА мухбири.

Суҳбат чоғида қурғоқчиликнинг олдини олиш ва унинг оқибатларини юмшатиш соҳасида икки томонлама ҳамкорлик, тажриба ва технологиялар алмашиш, бу борадаги алоқаларни мустаҳкамлаш масалалари муҳокама қилинди.

Томонлар, айниқса, қурғоқчилик ва чўлланиш муаммоси долзарблигича қолаётган Ўзбекистон каби мамлакатлар учун глобал иқлим ўзгариши келтириб чиқараётган муаммоларга қарши биргаликда курашиш муҳимлигини қайд этдилар.

Қурғоқчиликни олдини олиш институти томонидан амалга оширилаётган дастур ва лойиҳаларда Ўзбекистон томонининг иштирок этиш истиқболлари, шунингдек, қурғоқчиликни кузатиш ва эрта олдинги олишга қаратилган минтақавий тузилмаларни ривожлантириш бўйича мумкин бўлган ташаббуслар кўриб чиқилди.

Ласло Орлош институт расмий Тошкентнинг ушбу йўналишдаги ташаббусларини қўллаб-қувватлашга тайёрлигини билдириб, Ўзбекистоннинг тегишли вазирлик ва идоралари, шунингдек, илмий-тадқиқот муассасалари ва ташкилотлари билан ҳамкорлик қилиш муҳимлигини таъкидлади.

Учрашув якунлари бўйича ўзаро ҳамкорликни чуқурлаштиришга қаратилган қўшма лойиҳаларни тайёрлаш ва илмий анжуманларни ўтказиш масалаларини муҳокама қилиш мақсадида жорий август ойида институт делегациясининг Ўзбекистонга сафарини ташкил этиш бўйича келишувга эришилди.