ТОШКЕНТ, 17 октябрь. /"Дунё" АА/. Кувайтнинг етакчи компаниялари вакилларидан иборат делегация бизнес-миссия билан Ўзбекистонда бўлди, деб хабар қилмоқда "Дунё" АА мухбири.

Делегация таркибидан "Combined Group Contracting Co", "Alshaya Group" ва "Ahlia Group Co W.L.L." компаниялари раҳбарлари ва вакиллари ўрин олди. 

Кувайт бизнеси вакиллари сафар давомида Ўзбекистон Инвестициялар, саноат ва савдо вазирлиги, Иқтисодиёт ва молия вазирлиги, "Янги Тошкент" дирекцияси, Самарқанд вилояти мутасаддилари билан музокаралар ўтказди.

Мулоқотлар чоғида Кувайт хусусий инвестицияларини Ўзбекистонда давлат-хусусий шериклик лойиҳаларига, шаҳарсозлик ва гидроэнергетика соҳаларига жалб қилиш ва бошқа масалалар юзасидан фикр алмашилди.

 Кувайт томони Самарқанд вилояти Пайариқ туманидаги "Nasser Agro Trading" корхонаси билан қуритилган мевалар ва сабзавотлар экспортини амалга ошириш бўйича келишувга эришди.