ФРАНКФУРТ-МАЙН, 22 апрель. /“Дунё” АА/. Ўзбекистон дипломатлари Франкфурт-Майн шаҳри Савдо-саноат палатасининг халқаро алоқалар бўйича директори Юрген Ратцингер билан учрашди, деб хабар бермоқда “Дунё” АА мухбири.

Мулоқот давомида бош консул Мироншоҳ Раупов сўнгги йилларда икки мамлакат ўртасидаги муносабатлар янги босқичга кўтарилиб, стратегик шериклик даражасида ривожланиб бораётганини қайд этди.

Хусусан, Ўзбекистон Президенти Шавкат Мирзиёевнинг Германияга расмий ташрифи чоғида иқтисодий алоқаларни фаоллаштириш, мамлакатимиздаги ислоҳотларни қўллаб-қувватлаш ҳамда янги савдо, молия ва сармоявий битимларни имзолаш бўйича келишувларга эришилганини алоҳида таъкидлади.

Бош консул Германия Федерал канцлери Олаф Шольцнинг 2024 йил сентябрь ойида Ўзбекистонга уюштирган тарихий ташрифи икки томонлама муносабатларни сезиларли даражада мустаҳкамлаганини маълум қилди. У ташриф доирасида икки давлат ҳукуматлари ўртасида миграция ва мобиллик соҳасида кенг қамровли шериклик тўғрисидаги битим имзоланганига алоҳида тўхталиб ўтди.

Ўз навбатида, Юрген Ратцингер Савдо-саноат палатаси фаолияти, минтақанинг ривожланиши ва унинг хорижий мамлакатлар билан иқтисодий алоқалардаги ўрни ҳақида сўз юритди. Унинг айтишича, Франкфурт-Майн Савдо-саноат палатаси 108 мингга яқин компания ва тадбиркорни бирлаштирган ҳолда аъзолари сони бўйича Германияда иккинчи ўринда туради.

Юрген Ратцингер сўнгги йилларда демографик ва ижтимоий омиллар туфайли иқтисодиётнинг турли тармоқларида муайян касб мутахассисларига эҳтиёж борлиги, шу боис хорижий ишчи кучини жалб қилиш долзарб вазифага айланиб бораётганини таъкидлади. Шунингдек, у ушбу масалани муҳокама қилиш учун ҳар икки томон экспертларини жалб этган ҳолда алоҳида учрашув ташкил этишни таклиф қилди.

Учрашув якунида немис мутахассиси Ўзбекистонда фаолият юритаётган компанияларни Франкфурт-Майн шаҳрида ўтказиладиган кўргазма ва анжуманларда иштирок этишга таклиф қилди.