ҲЕЛЬСИНКИ, 13 февраль. /"Дунё" АА/. Мамлакатимиз элчихонаси кўмагида (қароргоҳи Рига шаҳрида жойлашган) Ўзбекистон Инвестициялар, саноат ва савдо вазирлиги ҳамда Финляндия Ташқи ишлар вазирлиги мутасаддилари ўртасида онлайн учрашув ташкил этилди, деб хабар қилмоқда "Дунё" АА мухбири.

Мулоқот давомида икки давлат ўртасидаги савдо-иқтисодий ва инвестициявий алоқаларни янада мустаҳкамлаш, ҳамда шу йил март ойи Ҳельсинкида бўлиб ўтиши режалаштирилган Иқтисодий ҳамкорлик бўйича Ўзбекистон-Финляндия ҳукуматлараро комиссиясининг навбатдаги йиғилиши ва унинг доирасидаги бизнес-форумга пухта тайёргарлик кўриш масалалари муҳокама қилинди.

Икки томонлама алоқаларни янада фаоллаштиришга қаратилган инвестициявий келишувлар ва экспорт шартномаларини имзолашга алоҳида эътибор қаратилди.

Учрашув якунида Ўзбекистон Инвестициялар, саноат ва савдо вазири бошчилигида делегациянинг Финляндия пойтахтига ташрифини амалга ошириш тўғрисида келишилди.