ИСЛОМОБОД, 21 август. /"Дунё" АА/. Ўзбекистон элчиси Алишер Тўхтаев Умум Покистон тўқимачилик уюшмаси (All Pakistan Textile Mills Association – APTMA) бош котиби Шаҳид Саттар билан учрашув ўтказди, деб хабар қилмоқда "Дунё" АА мухбири.

Мулоқотда Ўзбекистон ва Покистон ўртасида тўқимачилик соҳасидаги ҳамкорликнинг жорий ҳолати ва истиқболлари, икки мамлакатда соҳада амалга оширилаётган ислоҳотлар, биргаликда амалга ошириладиган лойиҳалар юзасидан фикр алмашилди.

Покистон томони ҳамкорликнинг барча шаклларида – Ўзбекистонда кам қувватда ишлаётган корхоналарни бошқарувга олиш, қўшма корхона ташкил этиш ёки корхоналарни сотиб олиш орқали шерикчиликни йўлга қўйишга қизиқиш билдирди.

Икки мамлакат раҳбарларининг олий даражали мулоқоти чоғида эришилган келишувларни амалга ошириш, янги истиқболли лойиҳаларни мувофиқлаштириш мақсадида жорий йил сентябрь ойида APTMA раҳбарлигида Покистоннинг етакчи тўқимачилик компаниялари делегациясининг Ўзбекистонга амалий сафарини ташкил этиш бўйича келишиб олинди. Делегация таркибига Покистоннинг "US Apparel", "Nishat", "Gul Ahmed", "Sapphire" ва "Ejaz" каби йирик компаниялари вакиллари киритилиши кутилмоқда.

Делегация аъзолари маҳаллий тўқимачилик корхоналарига ташриф буюриб, уларнинг фаолияти билан яқиндан танишиши ҳам кўзда тутилган.

APTMA бош котиби билан, шунингдек, икки мамлакат ҳудудида тўқимачилик соҳасида ташкил этиладиган турли кўргазмаларда нуфузли делегация ва миллий павильонлар билан қатнашишга ҳам келишиб олинди.