НАНЬША, 31 октябрь. /"Дунё" АА/. Юртимизнинг Гуанчжоу шаҳридаги Бош консулхонаси томонидан Хитойнинг Наньша шаҳрида бўлиб ўтаётган "2025 International Conference on Trade in Agricultural Services" йирик халқаро тадбирда Ўзбекистон қишлоқ хўжалиги ва озиқ-овқат саноати мавзусида тақдимот ўтказилди, деб хабар қилмоқда "Дунё" АА мухбири.

Конференция иштирокчиларига сўнгги йилларда Ўзбекистон қишлоқ хўжалиги соҳасида олиб борилаётган изчил ислоҳотлар ва эришилган натижалар, иқтисодий кўрсаткичлар, тармоқларнинг экспорт салоҳияти, хорижий компаниялар учун яратилган қулай ва хавфсиз ишбилармонлик муҳит, тақдим этилаётган имтиёз ва преференциялар тизими тўғрисида батафсил маълумот берилди.

Тадбир доирасида Хитойнинг қишлоқ хўжалиги йўналишида фаолият юритаётган қатор компаниялари билан Ўзбекистонга инвестиция ва инновацион технологияларни жалб қилиш юзасидан музокаралар ўтказилди.

Истиқболли ҳамкорлик йўналишларини белгилаш, аниқ келишувларга эришиш мақсадида мамлакатимизга бизнес-миссиялар ташкил этиш, тегишли вазирлик ва идоралар билан онлайн ҳамда оффлайн учрашувлар ўтказиш бўйича келишиб олинди.