КИЕВ, 1 июнь. /"Дунё" АА/. Ўзбекистоннинг Украинадаги элчихонасида "Киев халқаро иқтисодий форуми" қатнашчилари бўлган йирик тадбиркор ва инвесторлар иштирокида давра суҳбати бўлиб ўтди, деб хабар қилмоқда "Дунё" АА мухбири.

Тадбирда "Forbes" журнали таснифига кўра, Украинадаги энг йирик 100 та компанияси рўйхатига кирувчи "MEGOGO", "MTI GROUP", "UNIT.City", "МХП", "Sense bank", "Uklon", "Idealsecrets", "Аврора", "Текстиль Контакт" ва "EFI Group" каби 30 дан зиёд йирик компанияларнинг раҳбарлари ва топ-менежерлари иштирок этди.

Йиғилганларга жорий йилнинг 10-12 июнь кунлари юртимизда бўлиб ўтадиган IV Тошкент халқаро инвестиция форуми ҳақида батафсил маълумот берилди. Хусусан, мазкур анжуман доирасида хорижий ҳамкорлар учун бир қатор қизиқарли ва манфаатли инвестициявий таклиф ва инновацион ғоялар илгари сурилиши таъкидланди.

Шунингдек, элчихона дипломатлари томонидан украиналик тадбиркорларнинг Ўзбекистонда хорижий инвесторлар учун яратилган имтиёзлар, юртимизнинг савдо-инвестицион, транспорт-логистика, ахборот-технологиялари салоҳияти ҳамда консалтинг хизматлари соҳаларида ҳамкорлик қилиш билан боғлиқ саволларига атрофлича жавоб бердилар.

Украиналик тадбиркорлар ўз чиқишларида, Ўзбекистон томони билан турли соҳаларда алоқалар ўрнатиш ва амалий ишларни бошлашдан манфаатдор эканини таъкидлаб, Ўзбекистонга инвестиция киритиш бўйича амалий бизнес таклифларини билдиришди.

Жумладан, "Uklon" компанияси вице-президенти Дмитрий Казван Ўзбекистонда хорижий инвесторлар учун яратилган қулай шарт-шароитлар ва мамлакат бозорининг салоҳиятини инобатга олган ҳолда юртимизда ўз фаолиятини кенгайтиришини маълум қилди.

Шунингдек, "Idealsecrets", "UIS" ва "EFI Group" компаниялари раҳбарлари эса Ўзбекистоннинг IT технологиялар секторига сармоя киритиш масаласини ўрганаётганларини билдиришди.

 Алексей Мороз "Sense bank"нинг маркетинг бўйича директори:

– Украина ва Ўзбекистон ҳамкорлигини янада жадаллаштириш учун катта салоҳият бор. Менимча, бу учта хусусиятга боғлиқ:

 Биринчиси, менталитетнинг ниҳоятда ўхшашлиги. Ўзбекистон ва Украина ўртасида жуда яқин қариндошлик ришталари бор. Ватанга, ерга, жамият ривожига бўлган муҳаббат Украина ва Ўзбекистонни бир-бири билан боғлаб туради.

Иккинчиси,биргаликда мулоқот ва бизнес юритиш. Украина ҳам, Ўзбекистон ҳам кўплаб савдо йўллари чорраҳасида жойлашган бўлиб, бу келишувларни қандай тузишимиз, имкониятларни қандай кўришимиз борасидаги биргаликдаги ёндашувларни белгилайди. Ўзим ҳам Ўзбекистонда кўп ишлаганман. Албатта, ҳамкорлик қилиш учун имкониятларимиз жуда кўп.

Учинчиси, бу, "ривожланиш менталитети". Ўзбекистоннинг ҳам Украинанинг ҳам тараққиёт йўли бир жойда тўхтаб қолмаслик тамойилига асосланади. Бу ўзгариш, анъанавий йўллардан узоқлашиш, дунёда ўз ўрнини ва мавқеини излаш истагидир. Шунингдек, Ўзбекистон учун катта Осиё йўлбарси бўлиш, Украина учун эса Европа йўлбарси бўлиш имконияти мавжуд.

Дмитрий Романюк, "Frankof" мебель фабрикаси ҳаммуассиси:

– Бундай форматдаги учрашувлар ниҳоятда муҳим. Биз ҳали минтақада кўплаб янги бозорларни очмаганмиз ва бугунги кунда Украина компаниялари ушбу бозорни бевосита қизиқтириши мумкин бўлган кенг турдаги хизматлар ва товарларни таклиф қила олади. Юқори дипломатик даражада бўлиб ўтган мазкур учрашув Украина компаниялари учун фойдали бўлгани аниқ.

Дмитрий Казван, "Uklon" компанияси вице-президенти:

– Ўзбекистон билан, хусусан, бизнес йўли билан танишувим ҳали Американинг "Visa" компаниясида ишлаган пайтларимдан бошланган. Ҳозирги кунда ушбу ҳамкорлик "Uklon" компанияси билан давом этмоқда. Ўзбекистон қандай тез ўзгариб бораётганини кузатиш мен учун ниҳоятда қизиқ. Ислоҳотлар суръати, рақамлаштириш, халқаро инвесторларни жалб қилиш бўйича ишлар сени жуда илҳомлантиради ва агар сиз мамлакатнинг салоҳиятига, қанча ёшлар ва аҳоли мавжудлигига қарасангиз, у ерда ажойиб истиқболларни кўрасиз. Биз Украинада мавжуд қийинчиликларга қарамай, Ўзбекистон билан ўзаро ҳамкорлик муваффақиятли бўлишига ишонамиз.

Валерия Толочина, "Megogo" компаниясининг маркетинг бўйича директори:

 – Биз кўп йиллардан бери Ўзбекистон бозорида ишлаймиз ва ажойиб одамлардан иборат аҳил жамоамиз бор. Улар бу минтақани жуда фаол ривожлантирмоқда, мамлакатга ва унинг келажагига ишонадилар. Шунингдек, Ўзбекистон миллий маҳсулотларини ривожлантиришга катта эътибор берамиз. Ҳозирги кунда сентябрь ойида бўлиб ўтадиган "Ўзбек киноси ҳафталиги"га тайёргарлик кўряпмиз.

Ўзбекистонга кириб келаётган барча Украина бизнесига муваффақият тилайман. Чунки бизнес қанчалик яхши ишласа, мамлакат шунчалик яхши ривожланади, одамлар яхши яшайди ва гўзал сайёрамизда ажойиб келажакни биргаликда барпо этамиз.