КУАЛА-ЛУМПУР, 24 июль. /"Дунё" АА/. Ўзбекистон элчиси Каромиддин Гадоев Малайзиянинг Перак штатига ташрифи давомида "Sity Marine Products Group" компанияси қарашли балиқчилик кластери фаолияти билан танишди, деб хабар қилмоқда "Дунё" АА мухбири.

Ташриф давомида компания асосчиси ва бошқарув директори Сау Кеонг денгиз сувига махсус ишлов бериш орқали унда она креветка ва балиқларни парваришлаш, личинкалар ва балиқ чавоқларини олиш, етиштириш ва боқиш бўйича ўзининг 20 йиллик тажрибаси ҳақида сўзлаб берди. Унинг айтишича, компания Малайзиядаги креветкалардан личинкаларни олиш ва ёш креветкаларни парваришлаш бўйича ноёб технологияга эга кам сонли корхоналардан бири ҳисобланади.

Компания янги тутилган креветкаларни Малайзия штатларининг масофасига қараб 16-18 соатгача етказиб бериш самарали логистикасини йўлга қўйган. Шунингдек, компания чучук сувда балиқ човоқларини етиштириш ва денгиз суви тўлдирилган кичик бассейнларда уларни боқиш билан шуғулланади. Экспортга етказиб бериш занжирини янада такомиллаштириш мақсадида компания балиқ ва креветкаларни тозалаш, музлатиш ва қадоқлаш заводини ишга туширган.

Малайзия томони Ўзбекистонда балиқчилик соҳасида фаолият юритаётган тадбиркорларга балиқ ва креветка етиштириш бўйича ўз тажрибаларини бўлишиш, шунингдек, мамлакатимизга ўз маҳсулотлари етказиб бериш имкониятларини ўрганиб чиқишга тайёрлигини билдирди.

"Sity Marine Products Group" компанияси 1994 йил 8 октябрда Перак штатининг Манжунг шаҳрида ташкил этилган. Компания фаолияти балиқ ва креветкаларни етиштириш, қайта ишлаш ва чакана савдо тармоқларини етказиб беришга ихтисослашган. Гуруҳ таркибида тўртта шуъба корхона фаолият юритади. Компаниянинг Перак штатида 350 гектар майдонда жойлашган 500 дан ортиқ балиқчилик сув ҳавзалари мавжуд.