ДЕҲЛИ, 19 октябрь. /“Дунё” АА/. Ҳиндистоннинг йирик компаниялари Янги Тошкент ҳудудида амалга оширилаётган истиқболли лойиҳаларда иштирок этиш имкониятини ўрганмоқда, деб хабар бермоқда “Дунё” АА мухбири.

Ўзбекистон ва Ҳиндистон ўртасидаги сармоявий ҳамкорликни кенгайтириш ва етакчи ҳинд компанияларини Янги Тошкентдаги лойиҳаларга жалб этиш мақсадида ушбу давлатнинг етакчи компаниялари вакилларининг ташрифи ташкил этилди.

Ташриф 15-16 октябрь кунлари мамлакатимизнинг Ҳиндистондаги элчиси Сардор Рустамбоев ҳамроҳлигида бўлиб ўтди. Унда “Larsen & Toubro” компанияси вице-президенти Ражан Бансал, “Adani Group” компаниясининг Ўзбекистондаги лойиҳалар бўйича махсус вакили Ананд Кумар ва “Reliance Industries” компаниясининг халқаро алоқалар бўйича директори Маҳеш Кумар иштирок этди.

Ташриф Ўзбекистон Президенти раислигида 12 октябрь куни Янги Тошкент ҳудудига хорижий инвесторларни жалб этиш масалалари бўйича ўтказилган йиғилишда белгиланган вазифалар ижроси доирасида амалга оширилди. Ташриф дастуридан Президент раислигида Ёқилғи-энергетика тармоғи инвесторлари кенгашининг биринчи йиғилишида иштирок этиш ва Янги Тошкентдаги истиқболли инвестиция лойиҳалари билан танишиш ўрин олган.

Инвесторлар кенгаши йиғилишида “Reliance Industries” компанияси вакили Маҳеш Кумар сўнгги йилларда Ўзбекистон энергетикасида амалга оширилаётган ислоҳотлар ва эришилган натижаларни юқори баҳолади. У қуёш электр станцияларини қуриш ва электр энергиясини сақлаш тизимларини жорий этишда ҳамкорлик қилишга тайёрлигини билдирди.

Янги Тошкентга ташриф чоғида унинг дирекцияси раҳбарияти шаҳарни ривожлантириш режалари ва инвестиция имкониятлари, муҳандислик-коммуникация инфратузилмасини ривожлантириш, марказлашган иссиқлик таъминотини ташкил этиш, турар-жой ва нотурар-жой мажмуалари, йирик тижорат объектлари ва замонавий савдо-кўнгилочар марказлар қуриш лойиҳалари билан таништирди.

Тақдимотларда Янги Тошкент шаҳрини замонавий шаҳарсозлик тамойиллари асосида ривожлантириш, илғор технологиялар ва халқаро тажрибани жорий этиш, хорижий хусусий инвестицияларни жалб қилиш имкониятларига алоҳида эътибор қаратилди.

Ҳиндистон компаниялари вакиллари тақдим этилган лойиҳаларга қизиқиш билдириб, уларни батафсил ўрганиб чиқиш ва ҳамкорликнинг истиқболли йўналишлари бўйича ўз таклифларини тайёрлаш ниятида эканини билдирди. Ташриф якунида томонлар таклиф этилган лойиҳаларни ўрганиш ва музокараларни давом эттиришга келишиб олди.