СЕУЛ, 12 январь. /«Дунё» АА/. Ўзбекистон элчихонасида Жанубий Кореянинг «Tae-Chang NET Co., Ltd.» компанияси раҳбари Жи Ин Хо билан учрашув бўлиб ўтди, деб хабар бермоқда «Дунё» АА мухбири.

Учрашувда Жанубий Корея компаниясининг Тошкент ва Самарқанд вилоятларида жойлашган, умумий қуввати қарийб 30 МВт бўлган бешта гидроэлектр станциясини модернизация қилишда иштирок этиш масаласи муҳокама қилинди.

«Tae-Chang NET Co., Ltd.»  компанияси 2002 йилда ташкил этилган. Компания электр генераторлари, шамол ва гидроэнергетика блоклари учун турли моторлар, гидравлик тизимлар ҳамда технологиялар ишлаб чиқаришга ихтисослашган.

Жи Ин Хо «Ўзбекгидроэнерго» АЖ билан ҳамкорликда мавжуд ГЭСларнинг бугунги ҳолатини ўрганиш, шунингдек, энергетика соҳасида истиқболли лойиҳаларни амалга ошириш борасидаги ишлар ҳақида маълумот берди. 2023 йил сентябрь ойида томонлар ўртасида бўлиб ўтган музокаралар якунлари бўйича ўзаро англашув Меморандуми имзоланган. «Tae-Chang NET Co., Ltd.» томонидан ушбу ҳужжат асосида Тошкент ва Самарқанд вилоятларидаги бешта гидроэлектр станциясини модернизация қилишнинг техник-иқтисодий асосларини ишлаб чиқиш ишлари бошланди.

Жанубий кореялик мутахассислар лойиҳанинг асосий параметрларини аниқлаш мақсадида 2023 йил октябрь ва декабрь ойларида Ўзбекистонга ташриф буюрди. Улар ГЭСларнинг самарадорлигини ошириш ва узлуксиз ишлашини таъминлаш учун энергия блокларини тўлиқ алмаштириш масаласини кўриб чиқмоқда. Шу билан бирга, Ўзбекистон энергетиклари ва муҳандисларининг малакасини ошириш учун махсус ўқув курслари ташкил этиш кўзда тутилган.

Жи Ин Хо Корея халқаро ҳамкорлик агентлиги (КОИКА) грант маблағлари ҳисобидан Ўзбекистонда битта гидроэлектростанцияни модернизация қилиш бўйича тажриба лойиҳасини амалга ошириш режасини маълум қилди. Айни пайтда «Ўзбекгидроэнерго» АЖ билан биргаликда кейинчалик расмий ариза бериш учун лойиҳа концепциясини тайёрлаш ишлари бошланган.

Учрашув якунида «Ўзбекгидроэнерго» АЖ билан музокаралар олиб бориш учун жорий йилнинг февраль ойида Жанубий Корея делегациясининг Ўзбекистонга амалий сафарини ташкил этиш бўйича келишувга эришилди.