АЛ-КУВАЙТ, 12 апрель. /"Дунё" АА/. Мамлакатимиз элчихонаси кўмагида Ўзбекистоннинг тегишли вазирлик ва идоралари ҳамда Кувайтнинг "Marafie Group" компанияси вакиллари ўртасида онлайн учрашув ташкил этилди, деб хабар қилмоқда "Дунё" АА мухбири.

Унда Ўзбекистонда хорижий инвесторлар учун яратилган қулай шароитлар, тақдим этилаётган имтиёзлар, молиявий операцияларни амалга ошириш механизмлари, солиқ тўловлари турлари, кўчмас мулкка ва қишлоқ хўжалиги соҳаларига инвестиция киритиш имкониятлари, сармоядорнинг республикадаги ер майдони ва кўчмас-мулкка эгалик қилиш ҳуқуқлари ҳақида маълумот берилди.

"Marafie Group" холдинг компанияси бош директори, "Al-Tijaria" компанияси бошқарув кенгаши раиси Абдулҳаким Марафи Ўзбекистонда турли соҳаларда амалга оширилаётган инвестициявий лойиҳаларга сармоялар киритишга тайёрлигини маълум қилди.

"Ўзбекистонда қишлоқ хўжалиги маҳсулотларини етиштириш ва ҳўл мевалардан турли концентратлар тайёрлаш, меҳмонхона бизнеси, банк, туризм ва бошқа соҳаларга сармоя киритишдан мафаатдормиз", деди у.

 Музокаралар якунида "Marafie Group" компанияси делегациясининг жорий йил 14-15 апрель кунлари Ўзбекистонга бизнес-миссиясини ташкил этиш ва  ва сафар давомида Тошкентда сармоя киритишнинг аниқ йўналишлари  бўйича тегишли ташкилотлар билан учрашувлар ўтказиш бўйича келишиб олинди.