АНҚАРА, 27 октябрь. /“Дунё” АА/. Анқарада бўлиб ўтадиган Туркий давлатлар ташкилоти (ТДТ)нинг 13-саммити арафасида Анқара инқироз ва сиёсатни ўрганиш маркази (АНКАСАМ) раиси, профессор Меҳмет Сайфеттин Эрол Ўзбекистоннинг минтақавий ҳамкорликни мустаҳкамлаш ва ташкилотни ривожлантиришдаги ўрни ҳақида фикр билдирди, деб хабар бермоқда “Дунё” АА мухбири.

Таҳлил маркази раҳбари “Анқарада кутилаётган ТДТ тарихий саммити: Бош котиблик илк бор Ўзбекистонга ўтмоқда” сарлавҳали мақоласида бўлажак учрашув глобал беқарорлик ва геосиёсий зиддиятлар кучайган бир шароитда ўтаётганини таъкидлаган.

Профессорнинг баҳолашича, Туркиянинг раислиги ва яқин орада Ўзбекистон вакилининг Бош котиб лавозимига тайинланиши ташкилотнинг институционал ривожланиши учун янги имкониятлар очади.

Эксперт Президентлар Режеп Таййип Эрдоған ва Шавкат Мирзиёевнинг яқин ҳамкорлигига асосланган Анқара ва Тошкент ўртасидаги стратегик шерикликнинг алоҳида аҳамиятини қайд этди. Унинг таъкидлашича, Ўзбекистоннинг кўп томонлама дипломатия борасида тўплаган тажрибаси туркий давлатлар ўртасидаги амалий ҳамкорликни кенгайтиришга хизмат қилиши мумкин.

Меҳмет Сайфеттин Эрол устувор йўналишлар сифатида савдо ва инвестициялар, транспорт соҳасидаги ўзаро боғлиқлик, Ўрта йўлакни ривожлантириш, рақамлаштириш, энергетик ва экологик хавфсизлик, трансчегаравий таҳдидларга биргаликда қарши курашиш масалаларини алоҳида кўрсатиб ўтди.

Муаллифнинг фикрича, Анқара саммити ТДТнинг сиёсий мулоқотдан янада чуқурроқ иқтисодий ва институционал интеграцияга ўтишида муҳим босқич бўлиб, шаклланаётган кўп қутбли халқаро муносабатлар тизимида туркий дунё мавқеини мустаҳкамлаши мумкин.