ПАРИЖ, 27 октябрь. /“Дунё” АА/. Франциянинг Бретань минтақасидаги Ла-Шапель-Буэксик коммунасида “Бретон шамолларидан Буюк ипак йўлигача” шиори остида “Ouzh’Breizh” ўзбек-бретон маданий фестивали бўлиб ўтди, деб хабар бермоқда “Дунё” АА мухбири.

Ўзбекистоннинг Франциядаги элчихонаси ва коммуна мэрияси ҳамкорлигида 21–25 октябрь кунлари ўтказилган мазкур тадбир маҳаллий жамоатчиликни мамлакатимизнинг бой маданий мероси, миллий анъаналари ва санъати билан яқиндан таништиришга хизмат қилди.

 Унда юртимиздан ташриф буюрган санъат, маданият, мода ва миллий гастрономия вакилларидан иборат делегация иштирок этди.

Фестиваль дастуридан ўзбек ва бретон мусиқачилари ҳамда рақс жамоаларининг чиқишлари, миллий костюмлар намойиши, амалий санъат кўргазмалари, илмий-маданий конференциялар ва ҳунармандчилик бўйича маҳорат дарслари ўрин олди.

Меҳмонлар ўзбек миллий таомларидан татиб кўриб, каштачилик сир-асрорлари билан яқиндан танишдилар.

Коммуна мэри Роже Моразен ўзбек делегациясини қутлар экан, мазкур фестиваль икки халқ ўртасидаги маданий-гуманитар алоқаларни мустаҳкамлашда муҳим қадам эканини таъкидлади. Ўзининг Ўзбекистонга сафари чоғида халқимизнинг меҳмондўстлигидан катта таассурот олганини қайд этган мэр бундай тадбирлар туризм ва маданият соҳаларидаги ҳамкорликни янада кенгайтиришига ишонч билдирди.

Анъанавий мусиқа ассоциацияси вакили Рауль Дидье ҳам ўз навбатида ўзбек миллий мусиқаси ва рақслари иштирокчиларда улкан таассурот қолдирганини алоҳида эътироф этди.

Мазкур фестиваль Ўзбекистоннинг Франция ҳудудларидаги маданий иштирокини кенгайтириш ҳамда халқ дипломатияси алоқаларини янада мустаҳкамлашга хизмат қилди.