ФИЛАДЕЛЬФИЯ, 10 октябрь. /“Дунё” АА/. Американинг Филадельфия шаҳри маъмурияти биноси олдида мамлакатимиз мустақиллигининг 35 йиллиги ҳамда Давлат байроғи қабул қилинган кунга бағишланган Ўзбекистон байроғини кўтариш тантанали маросими бўлиб ўтди, деб хабар бермоқда “Дунё” АА мухбири.

Тадбир Ўзбекистон элчихонаси, мамлакатимизнинг Нью-Йоркдаги Бош консулхонаси ва “Vatan Global Alliance” миллий маркази томонидан ҳамкорликда ташкил этилди. Унда АҚШ расмий ва ишбилармон доиралари вакиллари, ўзбек диаспораси фаоллари ҳамда маҳаллий жамоатчилик вакилларидан иборат 100 га яқин киши иштирок этди.

Тадбирнинг энг муҳим воқеаларидан бири Филадельфия шаҳри мэри томонидан имзоланган расмий декларациянинг эълон қилиниши бўлди. Унга кўра, шаҳарда 8 октябрь Ўзбекистон-Америка маданий мероси куни (Uzbek American Heritage Day) деб эълон қилинди.

Ҳужжатда Ўзбекистоннинг Буюк ипак йўли тараққиётига қўшган тарихий ҳиссаси, Самарқанд, Бухоро ва Хиванинг бой маданий мероси юқори баҳоланган. Шунингдек, ўзбек халқининг архитектура ва ҳунармандчилик соҳасидаги ютуқлари, миллий анъаналари ҳамда ўзбек жамоасининг Филадельфиянинг ижтимоий ва маданий ҳаётига қўшаётган ҳиссасига алоҳида эътибор қаратилган.

Мазкур тадбир АҚШдаги ўзбек диаспораси билан алоқаларни янада ривожлантириш, ватандошларнинг мамлакатимиз ҳаётидаги иштирокини кенгайтириш ва Америка жамоатчилиги ўртасида Ўзбекистоннинг ижобий имижини тарғиб қилишга хизмат қилади.