ДЕҲЛИ, 15 ноябрь. /"Дунё" АА/. Ўзбекистон элчиси Сардор Рустамбоев Ҳиндистон маданий алоқалар кенгаши (Indian Council for Cultural Relations - ICCR) бош директори К. Нандини Сингла билан музокаралар ўтказди, деб хабар бермоқда "Дунё" АА мухбири.

Учрашув давомида томонлар кўп қиррали маданий-гуманитар шерикликни сифат жиҳатидан янги босқичга олиб чиқиш бўйича амалий қадамларни белгилаб олди.

Ўтган йиллардаги муваффақиятли лойиҳалар, хусусан, Ўзбекистоннинг "Сабо" рақс ансамбли ва "Сўғдиёна" миллий чолғу асбоблари оркестрининг ёрқин гастроллари ҳинд томошабинлари учун катта ва унутилмас маданий воқеага айлангани мамнуният билан таъкидланди. Шу билан бирга, келгусида ўзаро ҳамкорликни янги босқичга олиб чиқиш учун салмоқли салоҳият мавжудлиги эътироф этилди.

"Биз оддий ҳамкорлар эмасмиз, балки умумий маънавий илдизлар билан боғланган халқлармиз. Маданият ҳар доим ўзаро муносабатларимизга чуқур озиқлантирувчи муҳит бағишлаб келган", дея қайд этди Ўзбекистон элчиси.

Шу муносабат билан, Ўзбекистон томони қатор амалий таклифларни илгари сурди. Таниқли рақс жамоалари ва анъанавий ўзбек қўшиқлари ижрочиларининг гастролларини ташкил этиш, Ҳиндистон шаҳарларидаги галерея ва кўргазма майдончаларида ўзбек рассомлари ва ҳунармандларининг кўргазмаларини ўтказиш, янги қўшма лойиҳалар орқали ўзбек ва ҳинд тилларини ўзаро ўрганиш йўналишидаги ҳамкорликни фаоллаштириш ва бошқалар шулар жумласидандир.

Шунингдек, ўзбек талабалари учун Ҳиндистон олий таълим муассасаларида ажратилаётган квоталар сонининг оширилиши ва мутахассисликлар рўйхатининг кенгайтирилиши халқларимиз ўртасидаги анъанавий дўстликни мустаҳкамлашга хизмат қилиши урғуланди.

ICCR бош директори К. Нандини Сингла икки томонлама маданий ҳамда илмий-академик алоқаларнинг жадал ривожланаётганини юқори баҳолади. Ушбу мазмундаги шерикликни янада чуқурлаштиришдан манфаатдор эканини билдириб, янги лойиҳаларни амалга оширишга тайёрлигини изҳор этди.

Ўзбекистон ва Ҳиндистон маданий ва академик алмашинув бўйича саъй-ҳаракатларнинг янги босқичи бўйича келишиб олди. Узоқ муддатли ва самарали ҳамкорликни таъминлаш мақсадида қўшма маданий-гуманитар тадбирлар режасини ишлаб чиқиш имконияти кўриб чиқилди.

Учрашув икки мамлакатнинг кўп асрлик дўстлик ришталарини янги мазмун билан бойитишга бўлган ўзаро интилишини намоён этди.