БУДАПЕШТ, 21 октябрь. /"Дунё" АА/. Марказий ва Шарқий Европадаги етакчи цирк аренаси – Будапешт цирки (Fővárosi Nagycirkusz) ўзининг янги ижодий мавсумини бошлади, деб хабар беряпти "Дунё" АА мухбири.

18 октябрдан 31 декабргача циркда ака-ука Гриммлар эртагига асосланган ва цирк санъати, мусиқа, театр ва жонли визуал сценографияни ўзида мужассам этган "Она Хольле / Mother Holle / Holle Anyó" шоуси бўлиб ўтади.

Эътиборлиси, ушбу дастурга режиссёр Анвар Алиев томонидан ўзбек цирк труппаси иштирокида саҳналаштирилган "Алиев Инфинити" спектакли ҳам киритилган. Труппа дастурдаги энг ажойиб ва ​​техник жиҳатдан қийин ҳаракатлардан бирини бажариб, вертикал қутбда мувозанатни намойиш этмоқда. Ўзбекистонлик санъаткорларнинг иштироки азалдан халқаро саҳналарда эътироф этилган миллий цирк мактабининг юксак савиясини яна бир карра тасдиқлайди.

"Mother Holle" шоуси халқаро лойиҳа бўлиб, унда Ўзбекистон, Венгрия, Украина, Россия, Хитой, Нидерландия, Германия цирк санъати вакиллари иштирок этмоқда. Шоу ҳақиқат, тарбия, ўсиб-улғайиш ва меҳнатсеварлик ҳақида ҳикоя қилади. Ушбу чин инсоний жиҳатлар цирк, пантомима ва мусиқа тили орқали томошабинларга етказилади.

"Будапештда чиқиш қилиш биз учун катта шараф. Томошабинларнинг қўллаб-қувватлашини ҳис қилаяптмиз. Бу ерда ўзбек цирк санъатига бўлган юқори қизиқишни кўряпмиз ва бундан кейин ҳам мамлакатимизни халқаро саҳналарда намойиш этишда давом этамиз", – деди труппа раҳбари Анвар Алиев.

Будапешт цирки бир неча йиллар давомида минтақа цирк маданиятининг рамзи бўлиб қолмоқда. Ўзбекистон цирк санъати усталарининг ушбу лойиҳадаги иштироки ижодий алоқаларни мустаҳкамлайди, маданий дипломатияни ривожлантиради, ўзбек цирк мактабининг халқаро миқёсда тан олинишига хизмат қилади.