ВАРШАВА, 13 июль. /“Дунё” АА/. Ўзбекистон дипломатлари Польшанинг нуфузли “TVT” телеканали бош директори Роман Олма билан учрашди, деб хабар бермоқда “Дунё” АА мухбири.

Мулоқот жараёнида Ўзбекистоннинг туристик, маданий ва тарихий салоҳиятини Польша аудиториясига кенг тарғиб қилиш, миллий кино маҳсулотлари орқали мамлакатимиз имижини мустаҳкамлаш ҳамда ўзбек фильм ва сериалларини “TVT” телеканали эфирларида намойиш этиш масаласи муҳокама қилинди.

Музокаралар давомида телеканал томонидан Польшада ўзбек киноси ва сериалларини намойиш этиш бўйича маданий-кино лойиҳасини амалга ошириш таклиф этилди. Лойиҳанинг дастлабки босқичида 10 та бадиий фильм ва 10 та сериални поляк тилига таржима қилиш, овозлаштириш ҳамда эфирга узатиш режалаштирилмоқда.

Таклиф этилаётган фильмлар қаторига “Якшанба”, “Фариданинг икки минг қўшиғи”, “Иссиқ нон”, “Омад”, “Илҳақ”, “Мендирман Жалолиддин”, “Барон”, “Абдуллажон”, “Маҳаллада дув-дув гап” ва “Шум бола” киритилган.

Сериаллар рўйхатида “Сабр”, “Кўча”, “Зебо”, “Она”, “Юлдузлар мангу ёнади”, “Сариқ девни миниб”, “Қодирхон”, “Синчков”, “Яширин ҳовли” ва “Алвидо” мавжуд.

“TVT” вакиллари ўзбек кино маҳсулотларини поляк тилига таржима қилиш, дикторлик матнларини тайёрлаш ва овоз ёзиш билан боғлиқ техник харажатларни ўз зиммасига олишга тайёрлигини билдирди.