БЕРЛИН, 1 июль. /“Дунё” АА/. Мамлакатимизнинг Германиядаги элчихонасида Германияда истиқомат қилаётган ватандош педагогларнинг биринчи Қурултойи бўлиб ўтди. Унда ушбу мамлакатда фаолият юритаётган ўзбекистонлик педагоглар, таълим соҳаси мутахасислари иштирок этди, деб хабар беради “Дунё” АА мухбири.

Қурултойнинг асосий мақсади ватандош педагоглар ўртасида ўзаро алоқаларни мустаҳкамлаш, педагогика соҳасида уларнинг илғор тажрибалари ва ташаббусларини мамлакатимизга жалб этиш, мактаб таълими соҳасида ҳамкорликни кенгайтиришдан иборат бўлди.

Тадбирнинг очилиш маросимида Ўзбекистоннинг ушбу мамлакатдаги элчиси Дилшод Ахатов сўзга чиқиб иштирокчиларни қутлади. Элчи ўз нутқида сўнгги йилларда Янги Ўзбекистонда таълим, илм-фан, миллий меросни асраб-авайлаш ва хориждаги ватандошлар билан алоқаларни ривожлантириш давлат сиёсатининг муҳим йўналишларидан бирига айланганини таъкидлади.

Илмий анжуманда мамлакатимиздан ташриф буюрган Ўзбекистон Фанлар академиясининг “Германияда Туркистон адабиёти” илмий лойиҳаси вакиллари ҳамда “Жадидлар изидан” республика танлови ғолиблари ўз чиқишлари билан фаол иштирок этдилар. Хусусан, “Германияда Туркистон адабиёти” илмий лойиҳаси раҳбари профессор Шаҳноза Мадаева томонидан “Германияда Туркистон адабиёти” тўпламининг биринчи жилди тақдимоти ўтказилди. Тақдимот давомида Туркистон адабиёти, жадидчилик ҳаракати ва ўзбек маърифатпарварлари меросини Германия илмий муҳитида ўрганиш бўйича амалга оширилаётган ишлар ҳақида маълумот берилди.

Шунингдек, профессор Ноибахон Мамадалиева “Жадид даври намояндалари фаолиятида стандартлар, метрология ва маҳсулот сифати” мавзусида тақдимот қилди. Унда жадидлар фаолиятининг нафақат таълим ва маърифат, балки жамият тараққиёти, ишлаб чиқариш маданияти, сифат ва замонавий бошқарув қарашлари билан боғлиқ жиҳатлари ҳақида фикр юритилди.

Ушбу лойиҳа иштирокчиси, доктор Азамат Амиров форум келгусидаги илмий ишларга янги туртки берганини алоҳида таъкидлади. У ёшлар ўртасида миллий маданият ва тарихни оммалаштиришда бундай тадбирларнинг аҳамияти катта эканини қайд этиб, Ўзбекистон ва Германия ўртасидаги илмий-маърифий учрашувлар ҳамда делегациялар алмашинувини кенгайтириш тарафдори эканини билдирди.

“Жадидлар изидан” республика танлови ҳакамлар ҳайъати раиси Баҳром Ирзаев жадид боболаримизнинг миллат тақдири, давлат юксалиши йўлидаги курашлари ҳақида батафсил маълумот берди. Шундан сўнг “Жадидлар изидан” республика танлови ғолиблари ўзбек жадидлари ижодидан намуналар асосида чиқишлар қилдилар. Улар Германияда таҳсил олган жадид маърифатпарварларининг илм-фан, тараққиёт, миллий уйғониш ва маънавий юксалиш йўлидаги ҳаракатлари ҳақида тақдимот қилдилар. Ўқувчиларнинг Ватанни мадҳ этувчи шеърлар билан қилган чиқишлари йиғилганлар томонидан олқишланди.