БУДАПЕШТ, 9 январь. /"Дунё" АА /. Ўзбекистон маданият вазирининг биринчи ўринбосари Авазхон Таджиханов ва Венгрия Миллий кино саноати бўйича ҳукумат комиссари Чаба Каэль ўртасида онлайн музокаралар бўлиб ўтди, деб хабар қилмоқда "Дунё" АА мухбири.

Онлайн учрашувда, шунингдек, Кинематография агентлиги директори Шуҳрат Ризаев ҳамда Венгрия Миллий кино институти директори Акош Пал ҳам иштирок этишди.

Мулоқот чоғида, икки мамлакат ўртасидаги маданий ва ижодий алоқаларни кенгайтиришга қаратилган кинематография соҳасидаги ҳамкорликни чуқурлаштириш истиқболлари, шунингдек, қўшма фильмлар суратга олиш бўйича ҳукуматлараро битим лойиҳасини тайёрлаш масалалари муҳокама қилинди.

Шу ўринда, ўзбек ва венгр сайёҳлари Мулла Содиқ ҳамда Армин Вамбери тўғрисида тарихий кўшма фильм олиш масаласига алоҳида эътибор қаратилди.

Учрашув якунида жорий йилнинг 30 январь – 1 февраль кунлари Венгрияда Ўзбекистон кино ҳафталигини ўтказиш ҳамда қўшма кинолойиҳаларни амалга ошириш бўйича келишувларга эришилди. Томонлар ҳамкорликни ривожлантириш бўйича ишларни давом эттиришдан ўзаро манфаатдор эканликларини билдирдилар.