КИЕВ, 28 октябрь. /"Дунё" АА/. Ўзбекистоннинг энг йирик стартапи – "Uzum" компанияси 2027 йилда ўтказишни режалаштираётган акцияларнинг илк оммавий жойлаштирилиши (IPO) учун Лондонни эҳтимолий майдончалардан бири сифатида кўриб чиқмоқда, деб хабар қиляпти "Дунё" АА мухбири.

Украинанинг "Fixygen" ва "Open4business" электрон нашрларининг ёзишича, бу ҳақда "Uzum" компаниясининг ҳаммуассиси Николай Селезнёв "Reuters" агентлигига берган интервьюсида маълум қилган. Унинг айтишича, "Uzum" компаниясининг Лондон фонд биржаси компаниянинг халқаро капитал бозоридаги дебюти учун кўриб чиқилаётган вариантлар орасида. Лондондан ташқари, стартап Нью-Йоркдаги Nasdaq, шунингдек, Абу-Даби ва Гонконг биржаларидаги имкониятларни ҳам ўрганмоқда.

2022 йилда ташкил этилган Uzum қисқа вақт ичида Ўзбекистоннинг энг қиммат стартапига айланди, унинг қиймати 1,5 миллиард доллар. Август ойида Uzum Tencent ва АҚШнинг VR Capital фонди иштирокидаги акциявий маблағ жалб этиш раунди доирасида 70 миллион доллар инвестиция олди. Бу компаниянинг баҳосини 1,5 миллиард долларга етказди.

Николай Селезнёвнинг таъкидлашича, жойлаштириш нархи ҳақида ҳозирча гапириш эрта: "Агар биз Лондон фонд биржасида чиқишни танласак, албатта, FTSE 100 индекси доирасида ҳаракатланишни кўзлаймиз. "Uzum" хорижга чиқишдан олдин ички бозордаги позицияларини мустаҳкамлашга эътибор қаратишни режалаштирган".