АЛ-КУВАЙТ, 4 сентябрь. /“Дунё” АА/. “Al Jarida” нашрида мамлакатимизнинг Кувайтдаги элчиси Аюбхон Юнусов билан ўтказилган интервью эълон қилинди, деб хабар бермоқда “Дунё” АА мухбири.

Дипломатик ваколатхона раҳбари суҳбат давомида икки мамлакат ўртасидаги муносабатлар анъанавий дўстлик, мустаҳкам сиёсий ирода, ўзаро ҳурмат ва ишонч каби мустаҳкам тамойилларга асосланганини таъкидлаган.

У халқларимизни тинчликсеварлик, оила ва жамият қадриятларига содиқлик ҳамда самимий меҳмондўстлик каби муштарак қадриятлар бирлаштириб туришини қайд этган.

Президент Шавкат Мирзиёевнинг 2025 йил февраль ойида Кувайтга амалга оширган биринчи расмий ташрифи Ўзбекистон–Кувайт муносабатларини сифат жиҳатидан янги босқичга олиб чиқиш учун муҳим туртки бўлгани қайд этилди.

Мазкур ташриф давомида Кувайт Давлати Амири

Шайх Мишъал ас-Сабоҳ ва Валиаҳд Шайх Сабоҳ ас-Сабоҳ билан ўтказилган музокаралар сиёсий мулоқот, савдо-иқтисодий алоқалар, инвестициялар, саноат, соғлиқни сақлаш, таълим, транспорт ва логистика, маданият ҳамда туризм соҳаларида мустаҳкам пойдевор яратди. Ҳозирги кунда эришилган келишувлар аниқ амалий қадамларда ўз ифодасини топмоқда.

Элчи мустақилликнинг 35 йиллиги муносабати билан мамлакатнинг бой миллий давлатчилик анъаналари ва 3 минг йиллик тарихий илдизларига тўхталиб ўтди. Ўтган давр мобайнида мамлакат мустақил тараққиёт йўналишини белгилаб, халқаро майдондаги мақомини изчил мустаҳкамлади.

Дипломат Ўзбекистон ва Кувайт ўртасидаги тарихий ҳамда инсонпарварлик алоқаларини янада чуқурроқ савдо-иқтисодий ва маданий-гуманитар шерикликка айлантириш учун кенг имкониятлар мавжудлигини билдирди.

Президент Шавкат Мирзиёевнинг “Биз бугун кечагидан кучлимиз. Насиб этса, эртага бундан ҳам кучли бўламиз!” деган сўзлари “Янги Ўзбекистон” руҳини ҳамда халқимизнинг ўз куч-қудрати ва келажагига бўлган мустаҳкам ишончини ифода этиши таъкидланди.