АР-РИЁЗ, 3 сентябрь. /"Дунё" АА/. Саудия Арабистонининг оммабоп "Sahm News" газетасида "Ўзбекистон ўз мустақиллигининг 34 йиллигини нишонламоқда: бирлашган халқ порлоқ келажак қурмоқда" сарлавҳали мақола эълон қилинди, деб хабар қилмоқда "Дунё" АА мухбири.

Нашрда мамлакатимиз мустақиллигига бағишланган тантанали тадбир "Янги Ўзбекистон" боғида бўлиб ўтгани, унда давлатимиз раҳбарининг сўзлаган нутқи ҳамда ўзбек халқининг бирлик руҳида истиқболли келажак сари қадам ташлаётгани қаламга олинган.

"Ўзбекистон ўз мустақиллигининг 34 йиллигини "Янги Ўзбекистон" боғида нишонлади. Бу ерда халқнинг бирлик руҳи Президент Шавкат Мирзиёевнинг тантанали нутқида, ёрқин авиашоуда ва Мустақиллик монументи пойига гулчамбар қўйиш маросимида намоён бўлди. Давлат арбоблари, дипломатлар ва кенг жамоатчилик иштирок этган ушбу тадбирда шонли ўтмишни истиқболли келажак билан боғлайдиган "Янги Ўзбекистон" концепцияси ўз аксини топди", – деб ёзилган мақолада.

Нашрда, шунингдек, Президент Шавкат Мирзиёевнинг Ўзбекистон мустақиллигининг ўттиз тўрт йиллиги муносабати билан йўллаган қутловидан қўйидаги иқтибос келтирилган: "Бугун, мана шу улуғ айём кунларида ҳаммамиз бир ҳаётий ҳақиқатни чуқур ҳис этмоқдамиз. Янги Ўзбекистон ғояси асосида бошлаган улкан ислоҳотларимиз туфайли мустақиллик берган ҳуқуқ ва эркинликларни ҳар бир юртдошимиз ўз ҳаётида чуқур ҳис қилиб, бу имкониятлардан кенг фойдаланмоқда. Айнан ана шу улуғвор ғоя асосида биз уч минг йиллик бой тарих ва маданиятимизни қайтадан идрок этдик. Юртимиз заминидаги Биринчи ва Иккинчи Ренессанс анъаналарини ривожлантириб, Учинчи Ренессанс сари дадил амалий қадамлар қўймоқдамиз. Ишончим комил, бу йўлда Янги Ўзбекистон давлати, Янги Ўзбекистон жамияти буюк тарихимизни янги – янада юксак Уйғониш даври билан боғлайдиган мустаҳкам кўприк бўлиб хизмат қилади.

"Sahm News" Ўзбекистонда амалга оширилган муҳим ижтимоий ўзгаришлар ҳақидаги муҳим маълумотларни ҳам ўз ўқувчилари эътиборига тақдим қилган. Жумладан, ўтган саккиз йил ичида Ўзбекистонда 31 миллион квадрат метрдан ортиқ уй-жой қурилгани, камбағаллик даражаси эса 6,8 фоизга камайиб, 2,5 миллиондан ортиқ оила манзилли ижтимоий ёрдам олгани таъкидланган.

"Бу йилги Мустақиллик куни байрамлари нафақат шонли ўтмишни ёдга олиш имконияти, балки Ўзбекистоннинг бой тарих ва ёрқин келажак ўртасидаги мустаҳкам кўприкка айланишга интилишининг ёрқин тасдиғи бўлди", – дейилган мақола хулосасида.