АЛ-КУВАЙТ, 28 декабрь / "Дунё" АА /. Кувайтнинг "Ал-Жарида" газетасида "Туризм - Ўзбекистон иқтисодиёти келажагининг тамал тоши" номли мақола чоп этилди, деб хабар қилмоқда "Дунё" АА мухбири.

Мақолада таъкидланишича, Ўзбекистон ўзининг ноёб маданий ва табиий бойликлари билан жаҳон туризм соҳасида муҳим ўрин эгаллайди. Мамлакатимиз ҳукумати туризмга ўз иқтисодий стратегиясининг асосий омилларидан бири сифатида катта эътибор қаратаётганлиги, ҳамда соҳага сармоя киритиш ва уни иқтисодий ўсишнинг асосий драйверига айлантириш бўйича комплекс режаларни амалга оширишга интилаётганлиги эътироф этилади.

Айни пайтда Ўзбекистонда 5250 дан ортиқ туристик объектлари, жумладан меҳмонхоналар, хостеллар ва оилавий дам олиш масканлари мавжуд бўлиб, уларнинг сиғими тахминан 155 минг ўринга мўлжалланганлиги ҳақида маълумот берилади.

Қайд этилишича, Ўзбекистон қишки туризм каби ташаббуслар орқали йил давомида туризмни ривожлантиришга интилмоқда. Шу муносабат билан "Чорвоқ" ва "Зомин" каби туристик кўнгилочар ҳудудлар ташкил этилиб, "Шаҳрисабз", "Майданак" каби бошқа ҳудудларда лойиҳалар ишлаб чиқилаётганлиги эътироф этилган.

"Ўзбекистонда туризм соҳаси узлуксиз ўсишда давом этмоқда, –дейилади мақолада. – Мамлакат 2022 йилда 5,2 миллион халқаро сайёҳни қабул қилган бўлса, 2023 йилда ушбу кўрсаткич 6,7 миллионга яқин бўлди".

Муаллифга кўра, 2024 йил август ойига келиб Ўзбекистонда туризм секторидан тушган даромадлар 2 миллиард АҚШ долларидан ошди. Шу билан бирга, сайёҳларнинг ўртача қолиш муддати 7-8 кунгача узайди, бу эса туризм тажрибаси даражасининг яхшиланганлигини намойиш этади.

Мақола якунида "Ўзбекистон барқарор иқтисодий ўсишни қўллаб-қувватловчи ва маданий алмашинувни кучайтирувчи жаҳоннинг энг машҳур сайёҳлик йўналишларидан бирига айланиш учун барча имкониятларга эга", – деб ёзган "Ал-Жарида" газетаси.