АНҚАРА, 13 июль. /“Дунё” АА/. Мамлакатимизда илк бор ўтказилган I Халқаро Ислом цивилизацияси форуми Туркия оммавий ахборот воситалари диққат марказида бўлди, деб хабар бермоқда “Дунё” АА мухбири.

Хусусан, “Anadolu”, “TRT-Haber”, “TRT-Avaz”, “Haber7”, “Hibya”, “RHA Ajans”, “Türkiye”, “Yeni Şafak” каби етакчи турк ОАВ мазкур анжуман ҳақида туркум таҳлилий мақолалар эълон қилди.

Турк нашрлари глобал геосиёсий инқирозлар, радикализм ва исломофобия каби таҳдидлар кучайган ҳозирги шароитда Тошкентдан янграган конструктив чақириқлар бутун инсоният учун стратегик шериклик ва Шарқ билан Ғарб ўртасидаги мулоқот пойдевори бўлиб хизмат қилишини алоҳида эътироф этган.

Мақолаларда Ўзбекистон Президенти Шавкат Мирзиёевнинг форум делегатларига йўллаган мурожаати анжуманнинг концептуал асосини белгилаб бергани ҳамда Янги Ўзбекистон ғояси доирасидаги “Учинчи Ренессанс” ва “Жаҳолатга қарши маърифат” тамойилларини юксак баҳолаган.

Саммит доирасида ноёб қўлёзмаларни рақамлаштириш ва Ислом кутубхоналарининг халқаро иттифоқини тузиш каби 70 дан ортиқ аниқ амалий лойиҳалар кўриб чиқилди.

Туркия Президенти Режеп Таййип Эрдўғоннинг анжуманга йўллаган мурожаатига ҳам алоҳида эътибор қаратилган. Туркия етакчиси ўз мурожаатида ушбу ташаббус нафақат Ўзбекистон, балки бутун ислом олами учун улкан аҳамиятга эга эканини таъкидлаган.

“Муҳтарам Президент жаноблари, Сизнинг оқилона раҳбарлигингизда Ўзбекистон нафақат ўзининг буюк келажагини барпо этмоқда, балки Ислом тамаддунининг тинчлик, эзгулик ва биродарлик ғояларини дунёга баралла тараннум этувчи тарихий миссиянинг пешқадами ва байроқдори бўлиб майдонга чиқмоқда”, – дея эътироф этган Туркия Президенти.