ҚОҲИРА, 12 сентябрь. /“Дунё” АА/. Мисрнинг “Sada Elbalad English” ахборот агентлиги Ўзбекистон ва Жанубий Корея ўртасидаги стратегик ҳамкорликнинг чуқурлашувига бағишланган мақолани эълон қилди, деб хабар бермоқда “Дунё” АА мухбири.

Нашрда Ўзбекистон-Жанубий Корея муносабатларининг иқтисодиёт, инвестициялар, рақамлаштириш ва давлат молиясини бошқариш соҳаларидаги жадал ривожи ҳамда “Марказий Осиё – Корея Республикаси” ҳамкорлик форматининг аҳамияти ҳақида сўз юритилган.

Мақолада Жанубий Корея тажрибасидан фойдаланган ҳолда Ўзбекистон Ғазначилик хизмати тизимини модернизация қилиш масаласига алоҳида эътибор қаратилган. Ғазначилик хизмати қўмитаси делегациясининг KFIS семинаридаги иштироки, “dBrain+”, “e-Naradoum” ва “e-Hojo” тизимларини ўрганиш жараёни ҳамда Ўзаро англашув меморандумининг имзолангани маълум қилинган.

Бундан ташқари, нашрда яримўтказгичлар саноатидаги ҳамкорлик истиқболлари — “SK Group” ва “SK Hynix” компаниялари билан биргаликда “OSAT” ва “IC Design” лойиҳаларини ривожлантириш, жумладан, технологиялар трансфери ва кадрлар тайёрлаш масалалари кенг ёритилган.