МОСКВА, 12 сентябрь. /“Дунё” АА/. Россиянинг “Коммерсантъ Weekend” журналида Тошкентда очилган Замонавий санъат маркази ҳақида мақола эълон қилинди, деб хабар бермоқда “Дунё” АА мухбири.

Нашрда қайд этилишича, бу Ўзбекистондаги биринчи давлат замонавий санъат маркази ва Марказий Осиёдаги кўргазма, таълим, тадқиқот ҳамда маърифий фаолиятни бирлаштирган йирик муассасалардан бири саналади.

Марказ меъмор Вильгельм Гейнцельман лойиҳаси бўйича 1912 йилда барпо этилган тарихий бинода жойлашган. Дастлаб бу ерда трамвай депоси, кейинчалик эса шаҳарнинг биринчи трамвай тармоғини энергия билан таъминлаган дизель электростанцияси фаолият юритган. Бинони реставрация қилиш ишлари Франциянинг “Studio KO” меъморлик бюроси томонидан амалга оширилди.

Журнал лойиҳанинг халқаро ҳамкорлик кўламига алоҳида эътибор қаратган. Марказ ҳамкорлари орасида Гуггенхайм музейи, Тейт Модерн, Помпиду маркази, “Delfina Foundation”, АҚШ Миллий Осиё санъати музейи ҳамда Корея санъат кенгаши бор.

Мажмуа ҳудудида кутубхона ва тадқиқот маркази ҳам фаолият юритмоқда. Ташкилотчиларнинг фикрича, ушбу майдон Ўзбекистон ва хорижий мамлакатларнинг рассомлари, кураторлари, тадқиқотчилари ҳамда ёшлари ўртасидаги мулоқот масканига айланади.

2027 йилда марказда Зельфира Трегулова раҳбарлигида Илья ва Эмилия Кабаковларнинг кўргазмаси ўтказилиши режалаштирилган.