МОСКВА, 24 декабрь. /"Дунё" АА/. Россиянинг "Индустрия Евразии" журналида "Меҳмондўст Ўзбекистон – Марказий Осиёнинг янги сайёҳлик клондайки" сарлавҳали мақола чоп этилди, деб хабар бермоқда "Дунё" АА мухбири.

"2023 йил охиригача Тошкент, Самарқанд, Бухоро ва Ўзбекистоннинг бошқа шаҳарларига 10 миллион хорижий, жумладан, бир миллион россиялик сайёҳ келиши кутилмоқда, - дейилади мақолада. Жорий йил бошидан буён Ўзбекистонга 650 мингга яқин россиялик келган. Туристлар оқимини ошириш ва туроператорларни қўллаб-қувватлаш мақсадида 2024 йил 1 январдан бошлаб сайёҳлик оқими суст бўлган мамлакатлардан республикага жалб этилган ҳар бир сайёҳ учун рағбатлантирувчи субсидиялар ажратиш тўғрисида қарор қабул қилинди".

"Индустрия Евразии" журнали мисол тариқасида Самарқанд вилоятини келтирган: ўтган йилнинг ўзида Россиядан 100 мингга яқин сайёҳ келган бўлса, 2023 йил ноябрь ойи охирига келиб эса бу кўрсаткич 150 мингга етди. Нашрда қайд этилишича, сентябрь ойида Самарқанд меҳмонхоналарининг бандлиги 77-80 фоизни ташкил этган.

Мақолада таъкидланишича, янги Самарқанд аэропорти фойдаланишга топширилиши билан Россия ва Ўзбекистон авиакомпанияларининг қатновлар сони ҳафтасига 108 рейсга етган.

Журналда ёзилишича, баҳор фаслида Ўзбекистонда барча турдаги этник фестиваллар, музейлар, санъат галереяларига ташриф буюриш, ресторан ва кафеларда маҳаллий таомлардан татиб кўриш мумкин бўлади. "Ёзда хушбўй қовун, тарвуз, шафтоли пишади. Йилнинг исталган фаслида машҳур Фарғона водийсига ташриф буюриш, бу ерда қадимий Ўзбекистоннинг ҳақиқий муҳитини ҳис этиш мумкин. Қишда чанғи курортлари машҳур бўлиб, қўриқланадиган ҳудудларда сайр қилиш унутилмас таассурот қолдиради.  Йилнинг исталган вақтида бой тарихий мерос, ЮНEСКОнинг Бутунжаҳон мероси рўйхатидан киритилган меъморий ёдгорликлар ҳамда унутилмас табиий гўзалликлардан баҳраманд бўлиш имконияти мавжуд", - деб ёзади "Индустрия Евразии".