ВАРШАВА, 5 ноябрь. /“Дунё” АА/. Польшанинг илмий-таълим соҳасига ихтисослашган “Perspektywy” порталида “Польша ва Ўзбекистон олий таълим ва фан соҳасидаги ҳамкорликни кенгайтирмоқда” сарлавҳали  мақола эълон қилинди, деб хабар бермоқда “Дунё” АА мухбири.

Мақолада Польша вазир ўринбосари Марчин Кулясек ва поляк олий ўқув юртлари делегациясининг Тошкентга ташрифи қайд этилган. Делегация таркибига қатор университетларнинг ректорлари ва проректорлари, шунингдек, Польша Миллий академик алмашинув агентлиги (NAWA) директори Войцех Карчевский кирди.

Нашрнинг қайд этишича, поляк вазири 28 октябрь куни Бош вазир ўринбосари, таълим ва фан вазири Эркинжон Турдимов билан учрашув чоғида Ўзбекистонни Марказий Осиёда фан ва олий таълим соҳасида Польшанинг муҳим ҳамкори деб атаган.

Портал Ўзбекистон Жанубий Корея, Туркия ва Вьетнам қаторида NAWAнинг янги “Стратегик тўртлик” дастури қамраб олган давлатлар қаторига кирганини таъкидлайди. Дастур қўшма илмий тадқиқотлар, талаблар ва олимларнинг академик мобиллигини, шунингдек, қўшма ва икки томонлама диплом бериш лойиҳаларини ривожлантиришга қаратилган.

Шунингдек, нашрда поляк делегациясининг Тошкентда бўлиб ўтган Марказий Осиё халқаро таълим форумидаги иштироки алоҳида ёритилган. Минтақадаги бешта мамлакатнинг таълим вазирларини ўз ичига олган мазкур форум 1500 дан ортиқ иштирокчини жамлади. Форум якунлари бўйича поляк ва ўзбек олий ўқув юртлари ўртасида ҳамкорлик шартномалари имзоланди.