САНКТ-ПЕТЕРБУРГ, 12 июнь. /“Дунё” АА/. Санкт-Петербургнинг “Russia News” етакчи нашрида журналист Екатерина Надольскаянинг Россия–Ўзбекистон муносабатларининг ривожланишига бағишланган мақоласи эълон қилинди, деб хабар бермоқда “Дунё” АА мухбири.

Мақолада ёзилишича, икки мамлакат ўртасидаги маданий ҳамкорлик тобора кенгайиб бормоқда, Ўзбекистон яқинда бўлиб ўтган Петербург халқаро иқтисодий форумида фаол иштирок этди. Шу билан бирга, стратегик шериклик, иттифоқчилик, ўзаро ҳурмат ва кўп асрлик тарихий-маданий алоқаларга асосланган Ўзбекистон–Россия муносабатлари жадал ривожланмоқда.

Муаллиф Ўзбекистон Президенти Шавкат Мирзиёевнинг Петербург халқаро иқтисодий форумида иштирок этиши икки томонлама ҳамкорликнинг юксак даражасидан далолат беришини таъкидлаган.

Материалда Ўзбекистон барқарор иқтисодий ўсиш суръатларини, халқаро ҳамкорликка очиқлиги ва конструктив мулоқотга содиқлигини намоён этиб, Россиянинг Марказий Осиёдаги асосий шерикларидан бири сифатидаги ўз мавқеини изчил мустаҳкамлаб бораётгани маълум қилинган.

Нашрда Ўзбекистоннинг халқаро обрўси юксалиб, фаол ташқи сиёсати ва жаҳон саҳнасидаги роли ортиб бораётганига алоҳида эътибор қаратилган. Хусусан, муаллиф футбол бўйича Ўзбекистон миллий терма жамоасининг тарихда илк бор жаҳон чемпионати финал босқичига йўлланмани қўлга киритган тарихий ютуғига эътибор қаратган.

Мақола сўнггида замонавий Ўзбекистоннинг иқтисодиёт, маданият, спорт ва дипломатия соҳаларидаги ютуқларини халқаро ҳамжамиятга ишонч билан намойиш этаётгани, ишончли шерик ва кенг халқаро ҳамкорлик учун очиқ давлат сифатида майдонга чиқаётгани қайд этилган.