ЖИДДА, 18 март. /"Дунё АА/. Саудия Арабистонининг "Neprass", "Shafaq", "Al-Shaamal", "Al-Kifah news" ва "Shahdnow" сингари етакчи электрон нашрларда "Тошкент халқаро инвестиция форумида иштирок этиш учун рўйхатдан ўтиш жараёни бошланди" сарлавҳали мақолалар эълон қилинди, деб хабар бермоқда "Дунё" АА мухбири.

Нашрларда жорий йилнинг 2-3 май кунлари III Тошкент халқаро инвестиция форуми (TХИФ-III) бўлиб ўтиши маълум қилинган

"TXИФ – бу нафақат Ўзбекистон, балки бутун минтақа учун муҳим тадбир ҳисобланади, – деб ёзган Саудия ОАВ. – Анъанага мувофиқ, унинг дастурига давлат раҳбари даражасидаги ялпи мажлис, турли масалалар муҳокамасига бағишланган экспертларнинг 50 дан ортиқ учрашувлари, жумладан панель мунозаралари, давра суҳбатлари ва B2B музокаралари киритилган".

Мақолаларда форумнинг ҳар бир иштирокчиси ҳамкорлар билан манфаатлар кесишадиган нуқталарини топиши, муайян инвестиция лойиҳаларини ўрганиши, ўнлаб йўналишларда рўй бераётган сўнгги тенденцияларни муҳокама қилиши ва истиқболли таклифларни қабул қилиши мумкинлиги қайд этилган.

Таъкидланганидек, форум кун тартибида дунёдаги иқтисодий турбулентлик фонида барқарор ўсиш суръатларини намойиш этаётган, босқичма-босқич Марказий Осиёнинг ҳақиқий инвестиция марказига айланиб бораётган Ўзбекистоннинг салоҳиятини намоён этиш алоҳида ўрин тутади.

"Форум миқёси ва географияси йилдан-йилга ошиб бормоқда. Хусусан, TXИФ – 2022 (биринчи форум) форумига 56 давлатдан 2 мингдан ортиқ йирик инвесторлар ва юқори мартабали меҳмонлар ташриф буюрган бўлса, TXИФ – 2023 эса ўз майдонида 70 мамлакатдан 2500 иштирокчини жамлади. 2024 йилда Тошкент сайёрамизнинг барча қитъаларидан янада кўпроқ меҳмонлар – инвесторлар, расмийлар ва таҳлилчиларни қабул қилиши кутилмоқда", – деб ёзган Саудия Арабистони ОАВ.