ДУШАНБЕ, 22 декабрь. /«Дунё» АА/. Тожикистоннинг «Asia-plus» ахборот агентлиги Ўзбекистон ижтимоий-сиёсий  ҳаётида рўй берган энг муҳим воқеаларни кенг ёритмоқда, деб хабар қиляпти «Дунё» АА мухбири.

Жумладан, агентлик Президент Шавкат Мирзиёев раислигида 20 декабрь куни бўлиб ўтган тармоқ ва ҳудудларда ахборот технологияларини ривожлантириш ҳамда давлат бошқарувини рақамлаштириш бўйича устувор вазифалар юзасидан видеоселектор йиғилишига бағишланган ахборот материалини тарқатди.

Нашрда Ўзбекистонда 2024 йилда ишга тушириладиган дастурга кўра, «Ҳар бир маҳаллада камида икки нафар дастурчи» лойиҳаси амалга оширилиши таъкидланган.

«Келгуси йилдан бошлаб Ўзбекистонда  8 минг нафар энг иқтидорли ёшларни саралаб, нуфузли халқаро компаниялар талабига мос дастур асосида ўқитилади. Умуман олганда, халқаро IТ-компаниялар стандартларига жавоб берадиган дастурлар асосида 300 минг кишини ўқитиш ва иш билан таъминлаш режалаштирилган», - дейилади материалда.

«Asia-plus» АА, шунингдек, «Ўзбекистон Қозоғистон, Қирғизистон ва Тожикистонга автобус қатновини икки баравар оширади» сарлавҳали мақолани тарқатди.

Унда қайд этилишича, Ўзбекистон яна 1200 та автобус сотиб олади ва уларни тегишли йўналишларга қўяди. Шунингдек, қўшни Қозоғистон, Қирғизистон ва Тожикистонга автобус йўналишларини икки баробарга ошириш вазифалари белгиланган.

«Жорий йилда Ўзбекистонга хориждан 1,5 мингга яқин автобус олиб келинган. Авиация хизматлари бозорида ҳам рақобат юзага келди, 6 та хусусий компания иш бошлади. Йил бошидан буён хориждан 25 та янги самолёт келтирилиб, 17 та йўналиш очилди. Шу билан бирга, соҳада хизматлар ҳажми атиги 7,7 фоизга ўсди», - деб ёзган «Asia-plus».