СЕУЛ, 14 сентябрь. /“Дунё” АА/. Ўзбекистон Президенти Шавкат Мирзиёев Жанубий Кореяга замонавий технологиялар ва инфратузилма асосида XXI асрнинг “Янги Ипак йўли”ни шакллантиришни таклиф қилди, деб хабар бермоқда “Дунё” АА мухбири Жанубий Кореянинг “The Chosun Daily” нашрига таяниб.

Эслатиб ўтамиз, 13 сентябрь куни давлатимиз раҳбари 16 сентябрь куни Сеул шаҳрида бўлиб ўтадиган “Корея Республикаси – Марказий Осиё” биринчи саммитида қатнашиш учун давлат ташрифи билан Жанубий Кореяга келганди. Бугун давлатимиз раҳбарининг Жанубий Корея Президенти Ли Чжэ Мён билан музокаралари режалаштирилган.

Ўзбекистон Президенти “The Chosun Daily” газетасига берган интервьюсида икки мамлакат азалий ҳамкор ва яқин дўстлар эканини таъкидлади. Унинг сўзларига кўра, Жанубий Кореянинг саноат технологиялари Ўзбекистоннинг салоҳияти ва ресурслари билан уйғунлашуви сунъий интеллект, яримўтказгичлар, электромобиллар, биофармацевтика ва ақлли қишлоқ хўжалигини биргаликда ривожлантириш учун имкониятлар яратади.

Давлат раҳбари Ўзбекистон глобал қўшимча қиймат занжирларига чуқурроқ интеграциялашишга интилаётгани, Жанубий Корея эса таъминот занжирларини диверсификация қилишдан манфаатдор эканини қайд этди.

Шу муносабат билан, расмий Тошкент Жанубий Корея компанияларини бутловчи қисмларни харид қилишдан тортиб, тайёр маҳсулот ишлаб чиқаришгача бўлган тўлиқ циклни қамраб оладиган замонавий ишлаб чиқариш марказларини яратишда қўллаб-қувватлашга тайёр.

Мамлакат етакчисининг таъкидлашича, икки давлат ҳамкорлиги иқтисодий алоқаларнинг янги шаклига асос бўлиши мумкин. “Қадимий Ипак йўли савдо-сотиқ, ғоялар, билим ва технологиялар алмашинувига хизмат қилган бўлса, Янги Ипак йўлини илғор ишлаб чиқариш тармоқлари, рақамли инфратузилма, транспорт ва энергетика йўлаклари ёрдамида барпо этиш мумкин”, – деди Президент.

Жанубий Кореянинг тараққиёт модели ҳақида сўз юритар экан, давлат раҳбари ушбу мамлакат бир авлод даврида аграр иқтисодиётдан етакчи саноат давлатига айланганини қайд этди. У катта ютуқлар биргаликдаги саъй-ҳаракатларни талаб қилишини таъкидлаб, “Ёлғиз отдан чанг чиқмас” деган ўзбек мақолини келтирган.