РИМ, 13 ноябрь. /“Дунё” АА/. Ўзбекистоннинг Италиядаги элчихонаси ташаббуси билан икки давлат ўртасидаги ўзаро ҳамкорлик алоқаларига бағишланган “Visit Uzbekistan” халқаро журналининг илк итальян тилидаги махсус сони чоп этилди, деб хабар бермоқда “Дунё” АА мухбири.

“Visit Uzbekistan” Италиядаги “Dinara & Co.” нашриёт уйи билан ҳамкорликда чоп қилинди. Мамлакатимизнинг бой маданияти ва туризм салоҳиятини тарғиб этувчи ушбу журналнинг дастлабки саҳифаларида 2023 йил июнь ойида Ўзбекистон Президенти Шавкат Мирзиёевнинг Италияга амалга оширган ташрифи ҳақида материал эълон қилинган.

Шу билан бирга, нашрда икки давлат ўртасидаги муносабатларга стратегик шериклик мақоми берилгани ҳамда ўзаро ҳамкорликнинг янги босқичига бағишланган таҳлилий мақолалар ёритилган.

Журналда Ўзбекистон элчиси Абат Файзуллаев, Италия–Ўзбекистон савдо палатаси раиси Жоржо Веронези, таълим ва илм-фан вазирининг Италиядаги маслаҳатчиси Марко Фарчи ва бошқаларнинг интервьюлари ўқувчиларда катта қизиқиш уйғотади.

Мақолаларда дипломатик ва маданий алоқаларнинг фаол ривожланаётгани, ўзаро товар айирбошлаш ҳажмининг сезиларли даражада ўсгани ва истиқболли инвестиция лойиҳалари ҳақида алоҳида тўхталиб ўтилган.

Венеция биенналесидаги миллий павильонлар ҳамда Флоренция ва бошқа шаҳарларда ўтказилаётган йирик кўргазмалар Ўзбекистоннинг халқаро майдондаги нуфузини ошириб, юртимизга европалик сайёҳлар оқимининг кўпайишига хизмат қилаётгани таъкидланган.

Материалларда иқтисодиёт ва саноат соҳаларида 2023 йилдан бошлаб қўшма корхоналар ташкил этиш ва технологиялар трансфери устувор йўналишга айлангани алоҳида қайд этилган.

Ушбу йўналишда нефть-газ ва кимё саноати билан бир қаторда “яшил” энергетика, тўқимачилик, Жиззахда заъфарон етиштириш ҳамда қишлоқ хўжалиги маҳсулотларини чуқур қайта ишлаш истиқболли тармоқлар сифатида кўрсатилган.

Таълим соҳасидаги ҳамкорлик доирасида 2024 йил кузида Тошкентда Италиянинг 30 га яқин етакчи олийгоҳлари ректорлари иштирокида ўтказилган илк форум академик алоқаларни янги босқичга кўтаргани эътироф этилган.

Нашрда италиялик фотосуратчи Фернандо Руссонинг Ўзбекистон бўйлаб саёҳатидан олган таассуротлари, тарихий шаҳарларимиз ҳақида қизиқарли маълумотлар, миллий мода олами намояндалари ҳамда сайёҳлар учун фойдали тавсиялар ёритилган.

2017 йилдан буён инглиз тилида чоп этиб келинаётган “Visit Uzbekistan” журнали Ўзбекистоннинг маданияти, санъати, ҳунармандчилиги ва туристик имкониятларини халқаро майдонда танитувчи етакчи нашр ҳисобланади.