ТОШКЕНТ, 10 ноябрь. /“Дунё” АА/. Кеча пойтахтимизда Ўзбекистон ва Россиянинг етакчи ОАВ, маданият институтлари, театр, кино, музей соҳаси, рақамли платформалар, креатив индустриялар ва эксперт ҳамжамияти вакилларини жамлаган медиафорум ўз ишини бошлади, деб хабар бермоқда “Дунё” АА мухбири.

Муҳокамалар нафақат медиабозорни ривожлантириш, балки янада кенгроқ масала – жадал технологик ва ижтимоий ўзгаришлар шароитида маданий ўзига хосликни сақлаш, ўзаро англашувни мустаҳкамлаш ва замонавий мулоқот маданиятини шакллантиришга бағишланди.

“Медиада миллий маданий код: анъанавий қадриятлар ва келажакка нигоҳнинг уйғунлиги” мавзусидаги сессияга модераторлик қилган СМТИ директорининг биринчи ўринбосари Акрамжон Неъматов дунёдаги ўзгаришлар ахборот соҳасига бевосита таъсир кўрсатаётганига эътибор қаратди.

Унинг сўзларига кўра, нафақат ахборотни узатиш технологияси, балки уни истеъмол қилиш маданиятининг ўзи ҳам ўзгармоқда. Анъанавий ОАВ қаторига ижтимоий тармоқлар, рақамли платформалар, қисқа видеоформатлар, блогерлар, тавсия алгоритмлари ва сунъий интеллект қўшилди.

Бундай шароитда медиа ҳам ўзгариши – янада тезкор, мазмунли ва технологик жиҳатдан илғор бўлиши, шу билан бирга, касбий стандартларни, мазмуннинг тарихий теранлигини ва жамият олдидаги масъулиятни сақлаб қолиши лозим.

Акрамжон Неъматов бугунги кунда жамиятларнинг бир-бири ҳақида қанчалик тўлиқ ва холис тасаввурга эга бўлиши учун медиа ҳамжамияти зиммасида катта масъулият борлигини алоҳида таъкидлади.

Унинг сўзларига кўра, гап идеаллаштирилган қиёфа яратиш ҳақида эмас, балки маданий-тарихий меросни ҳам, реал ривожланиш жараёнларини ҳам акс эттирадиган мувозанатли ва замонавий тасаввурни шакллантириш ҳақида бормоқда.

Замонавий Ўзбекистон – бу айни пайтда қадимий цивилизация, бой маданий анъаналар ва жадал ривожланаётган жамият, янги ишлаб чиқариш корхоналари, университетлар, технологиялар ҳамда ёш креатив муҳит демакдир. Ўзбекистон аудиторияси ҳам замонавий Россиянинг кўп қиррали ҳаётини — маданият, илм-фан, таълим, жамият ва ҳудудлар ҳаётини тўлиқ кўра олиши шунчалик муҳимдир.

Акрамжон Неъматовнинг фикрича, айнан шу сабабли икки мамлакат ОАВ ва маданият институтлари ўртасидаги прагматик касбий мулоқот алоҳида аҳамият касб этмоқда. У нафақат ахборот алмашишга, балки биргаликда мазмунли контент яратишга – фильмлар, театр лойиҳалари, рақамли архивлар, таржималар, ёшлар ташаббуслари ва касбий алмашинувларга ҳам йўналтирилиши лозим.

У маданий код фақат ўтмиш мероси бўлиб қолмаслиги кераклигини қайд этди. Уни замонавий тилда, айниқса, янги рақамли муҳитда яшаётган ёш авлодга етказа билиш зарур.

Бунда янги технологиялар маданиятнинг мазмуний асосини сиқиб чиқармаслиги, аксинча, уни мустаҳкамлаши лозим. Асосий масала етказиш шаклида эмас, балки шу шакл орқали қандай маъно-мазмун ифодаланаётганидадир.

Акрамжон Неъматов миллий ўзига хосликни сақлаш, умумий анъанавий қадриятларни илгари суриш ҳамда холис ва профессионал медиамулоқотни ривожлантириш Ўзбекистон ва Россия халқлари ўртасидаги ўзаро англашув ва ишончни янада мустаҳкамлашнинг муҳим омилига айланиши мумкинлигини таъкидлади.