ТОКИО, 2 декабрь. /“Дунё” АА/. Юртимизнинг Япониядаги элчиси Мухсинхўжа Абдураҳмонов Япония давлат ташқи ишлар вазири Аяно Кунимицу билан учрашди, деб хабар қилмоқда “Дунё” АА мухбири.

Учрашувда давлат вазири Ўзбекистон Япония учун муҳим стратегик ҳамкор давлат эканини таъкидлаб, икки мамлакат ўртасидаги ўзаро ишонч ва ҳурматга асосланган узоқ йиллик ҳамкорлик алоқаларини юксак қадрлашини маълум қилди.

Суҳбатда сўнгги йилларда Япония ва Ўзбекистон ўртасидаги сиёсий, парламентлараро, савдо-иқтисодий, маданий-гуманитар, туризм соҳаларидаги ҳамкорлик алоқалари тобора кенгайиб бораётгани эътироф этилди.

Жумладан, жорий йилнинг август ойида Япония ташқи ишлар вазирининг Ўзбекистонга ташрифи ҳамда илк маротаба ўтказилган икки мамлакат ТИВ раҳбарларининг стратегик мулоқоти натижалари ўзаро ҳамкорлик алоқаларини фаоллаштиришга катта ҳисса қўшгани таъкидланди.

Учрашув якунида ташқи ишлар вазири билан икки томонлама ҳамкорликни янада кенгайтириш ва ривожлантириш бўйича мулоқотларни мунтазам равишда давом эттиришга келишиб олинди.