ХАНОЙ, 13 декабрь. / “Дунё” АА/. Ўзбекистоннинг Фавқулодда ва Мухтор Элчиси Ойбек Эшонов (қароргоҳи Жакартада жойлашган) кеча Вьетнам Президенти Лионг Кионгга ўзининг ишонч ёрлиқларини топширди, деб хабар бермоқда “Дунё” АА мухбири.

Ханойдаги Президент саройида бўлиб ўтган расмий маросим доирасидаги қисқа суҳбат чоғида Вьетнам раҳбари Ўзбекистон Президентига чуқур ҳурмат ва энг эзгу тилакларини етказишни сўради. У Вьетнам мавжуд икки томонлама дўстона муносабатларни юқори баҳолашини ва уларни янада ривожлантиришдан манфаатдор эканлигини таъкидлади.

Унинг сўзларига кўра, Вьетнам ҳукумати Ўзбекистонни Марказий Осиёда ишончли ва устувор ҳамкор деб билади.

Президент, географик узоқликка қарамай, икки томонлама ҳамкорлик изчил равишда ривожланаётганини қайд этди. Шунингдек, у Вьетнам Ўзбекистонни Осиё-Тинч океани минтақаси мамлакатлари билан боғлайдиган ўзига хос кўприк вазифасини ўташи ҳамда ўзаро манфаатли алоқаларни кенгайтиришга тайёр эканини қайд этди.

Мулоқот давомида савдо-иқтисодий, инвестициявий ва маданий-гуманитар соҳаларда Ўзбекистон-Вьетнам ҳамкорлигини фаоллаштириш учун катта салоҳият мавжудлиги таъкидланди. Вьетнам Президенти Ўзбекистоннинг ижтимоий-иқтисодий ривожланишдаги ютуқларини, олиб борилаётган ислоҳотлар натижаларини ва мамлакатда содир бўлаётган кенг кўламли ўзгаришларни юқори баҳолади.

Учрашув якунида Президент Лионг Кионг Коммунистик партия раҳбарияти, Ҳукумат ва Ветнам халқи номидан Ўзбекистон Республикасига изчил тараққиёт, барқарор ривожланиш ва фаровонлик тилади.

Эслатиб ўтамиз, элчи Ойбек Эшонов 2024 йил 4 ноябрь куни Жакартада Индонезия Президенти Субианто Прабовога ўзининг ишонч ёрлиқларини топширган ва 2025 йил март ойидан бошлаб Жануби-Шарқий Осиё Давлатлари Ассоциацияси (АСEАН) ҳузуридаги доимий вакил сифатида аккредитациядан ўтган.