БУДАПЕШТ, 2 декабрь. /“Дунё” АА/. Ўзбекистоннинг Венгриядаги Элчихонаси кўмагида “Тараққиёт стратегияси” маркази ижрочи директори Элдор Туляков раҳбарлигидаги делегациянинг Будапештга ташрифи амалга оширилди, деб хабар қилмоқда “Дунё” АА мухбири.

Мамлакатимиз делегацияси Корвин номидаги Будапешт университети томонидан ташкил этилган “Келажакни белгилаш: Европа ва туркий давлатларда геосиёсат ва энергетика” мавзусидаги халқаро конференцияда иштирок этди.

Конференцияда Туркия, Озарбайжон, Марказий Осиё давлатлари, Европа Иттифоқи, Хитой, Сербиядан эксперт ва тадқиқотчилар иштирок этди.

Ташриф давомида Туркий давлатлар ташкилотининг роли, минтақавий энергетика интеграцияси, альтернатив транспорт-логистика коридорлари ва стратегик ресурслар соҳасида ҳамкорлик масалаларига алоҳида эътибор қаратилди.

Иштирокчилар Марказий Осиё, хусусан, Ўзбекистоннинг экологик энергетика, критик хомашё етказиб бериш ва минтақавий ҳамкорликда ишончли шерик сифатидаги аҳамияти ортиб бораётганини таъкидлади.

Элдор Туляков ўз нутқида Марказий Осиёнинг янги геосиёсий ва энергетик воқеликларини таърифлаб берди, Ўзбекистонни яшил энергетикага ўтиш, муҳим хомашё ва логистика масалаларида ишончли ҳамкор сифатида таништирди. Минтақанинг иқтисодий ва инфратузилмавий интеграциясини рағбатлантиришда Туркий давлатлар ташкилотининг роли ортиб бораётганини қайт этди.