САМАРҚАНД, 4 сентябрь. /“Дунё” АА/. Парламентлараро Иттифоқ Бош котиби Анда Филипп “Дунё” АА мухбирига берган эксклюзив интервьюсида Самарқандда ўтаётган XII Глобал ёш парламент аъзолари конференциясининг аҳамияти ҳақида фикр билдирди.

– Биз бир неча йилдан бери Ўзбекистон парламенти билан яқин ва самарали ҳамкорлик қилиб келмоқдамиз. Бу мамлакатингизда ўтказаётган биринчи йирик тадбиримиз эмас. Ҳозирги конференция Тошкент ва Самарқандда ўтказилаётган бешинчи йирик парламентлараро тадбиримиз бўлди.

Биз Ўзбекистондан жуда миннатдормиз. Янги Ўзбекистон қисқа вақт ичида эришган улкан тараққиётдан ҳайратдамиз.

Ёшларнинг ҳуқуқ ва имкониятларини кенгайтиришга қаратилган ташаббусларни юқори баҳолаймиз. Айниқса, иқтисодий ривожланиш, таълим ва янги технологияларни жорий этиш соҳаларидаги ишлар муҳим.

Ёш депутатларни жамият ҳаёти ва сиёсий жараёнларга фаол жалб этиш ҳам катта аҳамиятга эга.

Президент жанобларининг ёш парламент аъзоларига йўллаган табригини эшитиб, хурсанд бўлдим. Биз унинг нафақат миллий, балки халқаро миқёсдаги етакчилигини ҳам юқори қадрлаймиз.

Айниқса, инсон манфаатларига асосланган бошқарув борасидаги ёндашуви эътиборга лойиқ. Бундай ёндашувда аҳоли эҳтиёжлари ва манфаатлари биринчи ўринда туради.

Ўзбекистоннинг БМТ Бош Ассамблеясига барқарор ривожланиш мақсадларига эришишда парламентларнинг роли ҳақидаги резолюцияни киритиш ташаббусини ҳам қўллаб-қувватлаймиз.

Ушбу ҳужжатнинг консенсус асосида қабул қилингани муҳим ютуқдир.

Тошкент Ассамблеяси якунлари ва БМТ Бош Ассамблеяси томонидан қабул қилинган ушбу резолюция Парламентлараро Иттифоқнинг келгуси фаолияти учун муҳим йўналиш бўлиб хизмат қилади.

Бу ҳужжатлар Барқарор ривожланиш мақсадларига эришишда парламентлар ролини янада кучайтириш учун янги имкониятлар яратади.

Ёш парламент аъзоларининг ғайрати, фидойилиги ва ўзгаришларга интилишини қадрлаймиз. Улар аллақачон етакчиларга айланган. Ёшлар ўз навбатини кутиб ўтирмаслиги керак.

Ёш депутатлар халқ вакиллари сифатида катта масъулиятга эга. Биз уларни бу имкониятдан самарали фойдаланишга чақирамиз. Улар парламентлар фаолиятида янада фаол иштирок этишлари керак.

Ёшларнинг куч-ғайрати, янги ғоялари ва лидерлик қобилияти парламентлар ва жамиятнинг янада ривожланишига катта ҳисса қўшиши мумкин.